Latgolys Radejis zinis (22.01.2008.)

Šudiņ Davgavpils tīsa planoj skateit kriminallītu par guņsgrāka izraiseišonu beistamūs atkrytumu izguoztuvē Davgavpils rajonā. Da šam itymā kriminallītā tīsa ir nūpratynuojuse divus līcinīkus. Lītys skateišonu vajadzē atlikt saisteibā ar cītušuos pusis puorstuovu naīzarasšonūs. Jau ziņuots, ka aizdūmuos par 2006.goda majā izraiseitū guņsgrāku teik turāts kaids 1981.godā dzims veirīts. Jis paskaidrovs, ka naktī izguoztuvē mekliejs gumeju rotu remontam.

Finanšu ministreja i tuos sadarbeibys partneri – Eiropys Socialuo fonda vadeibā īsaisteituos institucejis ar sabīdriskūs attīceibu agenturys “Eko Media” paleidzeibu organizej ceļojūšū izstuodi „Eiropys Socialuo fonda projektu paruode”, kas veļteita ESF 50.godadīnai i 3 godu darbeibai Latvejā. Izstuode sastuov nu 12 objektym, kas tiks izstuodeiti 25 Latvejis piļsātuos četru nedeļu laikā. Kotrā plānuotajā piļsātā izstuode nūzarysynuos vīnu dīnu nu pulkst. 12.00 leidz 19.00. Vakar tei beja Kruoslova,šudiņ byus – Preiļūs, reit- Rēzeknē, tod arī Ludzā i Bolvūs.

Leluokuo daļa jākubpilīšu – 58 %, ir apmīrinuoti ar piļsātys dūmis dorbu. Paguojušuo goda novembrī i decembrī pietiejumu centra SKDS aptaujis dati līcinoj, ka ar Jākubpiļs dūmis dorbu bejuš vairuok apmīrinuoti respondenti vacumā nu 45 – 54 godim, latvīši, pilsūņi, privātajā sektorā struodojūšī, īdzevuotuoji ar augstuokū izgleiteibu nu grupys ar augstim īnuokumim, tys ir viers 201 lata mienesī vīnam cilvākam. 70% uzskota, ka ļūti pozitiva ir piļsātys lobīkuortuošona, 60 % – ka tei ir iudiņsapguode, bet 68 % – kulturys problemu rysynuošona.

Latvejis Investiceju i atteisteibys aģentura (LIAA) šudiņ Preiļūs reikuos seminaru, lai informeitu par programmu “Atbolsts īguldejumim seikūs i mozūs komersantu atteisteibā eipaši atbolstamajuos teritorejuos”. Bezmoksys seminarā uzjiemieji varēs uzzynuot par programmys pamatnūsacejumim i projektu sagatavuošonu. Seminars suoksīs plkst.11 Preiļu nūvoda Kulturys centrā.

Šūret iz Latvejis i Krīvejis rūbežys Terehovys rūbežkontrolis punktā gaida 30 automašynys, sovuokuort Grebņevā ryndu nav.