Jauns gods
Gods aiz goda īt vīns aiz ūtra, ar kotru mes palīknam pīredziejušuoki, īspiejams ari gudruoki, koč ari poši labi saprūtam, ka ar nazkū otkon itaidi Jaunuo goda sagaideišonys svātki atsakuortoj – nu vyss tak ir gondreiž tai pat, kau jau kotra goda beiguos i ar cereibom gaidam nuokamū.Ka jau mes vysi tai atsakuortojam, tod i as, raksteidams itū komentaru, apsavieru, kū Latgolys Radejā stuosteju pyrms goda ap itū pošu laiku. Kai izaruoda, ari tūlaik saceju, ka kotrs jaunais gods īzeimej kaidu nuokušū cereibu…
Tai jau ir – vysim myusim tūs cereibu i skaistu sapynu ir vairuok na kai dzeivis īspieju. Vacuos idejis vēļ nav eistynuotys, kai jau dzymst jaunys. Nazkai ar vīnu aktivu Latgolys sabīdriskū darbinīku smiejamīs, ka myusim iz divejim ir tik daudz ideju (taitod ari cereibu i sapynu), ka pītyktu vysmoz trejim myužim kū dareit.
Deļ tam, saceisim sovaiduok: aj šur – pastuost sovys idejis, sovus sapynus i tod varbyut mes atrassim koč kū kūpeigu i varāsim vīns ūtram paleidzēt! Latgolai vys vēļ tryukst cylvāku, kas nasabeistās pīpiļdeit sovys cereibys i gondreiž nav nivīna, kas byutu spiejeigs bez cytu atbolsta i paleidzeibys eistynuot sovu sapynu. Tev var kaids paleidzēt i naaizmierst, ka Tu pats vari kaidam ar seikumu dūt cīš svareigu atbolstu.
Nu, pīvadumam, cik daudzeji mes, latgalīši, atsaļuovem sapņuot par sovu radeji – „Latgolys Radeji” – pyrms kaidim 2ejim-3jim godim? Tu varbyut gribi saceit, ka Tev gar tū nav nikaidys saisteibys? Atsarunuosi, ka „Latgolys Radeji” sataiseja puors uzjiemeigu cylvāku? Bet, ja Tu klausīs „Lagolys Radeji”, tod jau esi tū atbaļstejs. Seikums? Nā, tys ir pats golvonais – ja Tu nazaklauseisi, tod radejis nabyus. Ja Tu nalaseisi LaKuGa.LV, tod ari myusu ite nabyus.
Itai pa druskai mes kūpeigi varam pīpiļdeit myusu leluos cereibys. Pasaver jau šudiņ apliek – varbyut Tu vēļ kaidu seikumu naesi pamanejs i naatlīc tū iz nuokamuo goda 1.janvari – suoc jau šudiņ! Jau šudiņ suoksim eistynuot myusu sapynus, turpynuosim reit i vysu 2008.godu!
Vysu lobu!
