Konkursā par Leivuonu nūvodam rakstureiguokū suveniru sajemti četri dasacejumi

Leivuonu nūvoda dūmis izsludinuotajā konkursā “Līvānu novadam raksturīgākais suvenīrs” sajemti četru daleibnīku dasacejumi. Īsyuteitī dorbi itamā nedeļī tiks izviertāti, i pīktdiņ, 21.decembrī, tiks paziņuoti konkursa īveicieji. Leivuonu nūvodu reprezentejušuos duovonas/suvenira idejis autors – pyrmuos vītas īgiviejs – bolvā sajems 150 latus, bet ūtruos i trešuos vītas īgivieji – atzineibas bolvas.

Ludzas dūme dašķieruse 6012 latus Zīmassvātku duovonu īguodei Ludzas pyrmškolas vacuma bārnim i pamotškolas školānim. Zīmassvātku duovonas, kas naudys izteiksmē ekvivalentas četrim latim, sajems 1503 Ludzas izgleiteibas īstuožu audziekņi.

Šudiņ (19.12.2007.) plkst.18 Daugavpilī, Sv.Pītera bazneicā, nūtiks Vīneibas noma īsvieteišonas 70.godadīnai velteits svātku dīvkolpojums, kuramā dasadaleis Latvīšu kulturas centra jauktais kūrs “Daugava” i sīvīšu kūrs “Rūta”. Vīneibas noms Daugavpilī vys veļ veic sovu viesturiskū miseju – iztur latvisku kulturvidi pylsātā, vīnoj i aktivizej kulturas dzeivi, jo tymā atsarūn Latvīšu kulturas centrs, Valsts Daugavpils teatrs i Latgolas Centraluo biblioteka.