Zinis (10.12.2007.)
Šudiņ Jēkabpils Vaļsts ģimnāzejā nūtiks zīduojumu akceja ”Breinumsvece”. Akcejis mierkis ir savuokt zīduojumus- puortyku,soldonumus i visaidus nīceņus, kab Zīmyssvātku prīkšvokorā īprīcynuotum i dovynuotum gaišus prīka mirkļus daudzbārnu saimem, invalidim i vīntulīm cilvākim. Savuoktuos duovonys adresatim iznosuos breivpruoteigī nu školānu vyda. Zīduojumu vuokšonys tradiceja tyka aizsuokta jau pyrms vairuok nakai desmit godim.
VAS “Latvijas Valsts ceļi” (LVC) reikoitejā konkursā par Istrys tylta (Ludzys rajonā) rekonstrukcejas byuvprojekta izstruodi uzvariejuse SIA “Projekts 3”. Konkursā tyka sajimti septeni pīdovuojumi, bet par uzvarietuoju atzeits “Projekts 3”, kas byuvprojektu pīdovuos izstruoduot par 16 000 latim.
Šudiņ Daugavpiļs universitatē (DU) suoksīs i da 14.decembram turpynuosīs pasuokumu cikls “Zvīdrejis kulturys nedeļa Daugavpilī”. Pasuokumu cikls veļteits slavenuos zvīdru rakstneicys Astrīdas Lindgrēnas 100.dzimšonys dīnai i īvāruojamuo humānista Aksela Muntes 150.dzimšonys dīnai. Ituos nedelis mierkis ir radeit izpratni par kulturys komunikacejis procesim i snīgt prīkšstatu par zvīdru i latvīšu kulturys kontaktim.
Augstuokuo tīsa šudiņ planoj skateit krimināllītu, kurā par Ludzys rajona Istalsnys posta nūdalis postneicys Mārītes Goremiko auplaupeišonu i slepkaveibu apsiudzāti Vladimirs Daliba i Vladislavs Krupenko. Īprīšk tīsvedeiba tyka aptureita, partūka obim apsiudzeitīm, piec prokurores lyuguma, tyka nūsaceita puorbaude iz malu detektora, pamatojūtīs iz tū, ka Daliba nūlīdz sovu leidzdaleibu nūzīgumā, bet Kurpenko līceibuos ir daudz pretrunu.
Preiļu nūvoda īdzeivoituoji reit plkst.17.30 teik aicynuoti īzarast kulturys nomā iz tikšonūs ar Preiļu nūvoda dūmes deputatim, izpildinstitucejis puorstuovim, SIA „Preiļu saimnieks” i dūmis īstuožu vadeibu. Prezeņtēs paveiktū nūvodā 2007.godā, īpazeistynuos ar anketeišonys rezuļtatim, stuosteis par īcerem 2008.godam, kai ari uzklauseis prīšklykumus par pošvaldeibys kompetencē asūšīm vaicuojumim.
Šudiņ Rēzeknē stuojās spākā jaunais syltumenergejis tarifs. Latgolys pošvaļdeibu daudznūzaru regulators apstyprynuojs, ka saražoituos syltumenergejis tarifs Rēzeknē byus par 45% vairuok nakai da šam spākā asūšuo moksa par syltumu. Par novembrī un decembrī sajimtū syltumu tiks moksoits piec vacuo tarifa. Leidz ar tū piec jaunuo tarifa par pīguodoitū syltumenergeju rēzeknīši moksois tikai janvarī.
Šudiņ Latgolys opgoboltīsa turpynuos skateit Leivuonūs pa lūgu izsvīstuo zeidaiņa kriminallītu, kurā tyka apsyudzeita bārna baba. Apsiudzeiba uzruodeita par slepkaveibu vainu pastyprynūšūs apstuokļūs, partū ka nūslepkavoituo persona bejuse bezpaleidzeibys stuovūklī. Jau ziņuots, ka 2006.goda 30.seņtebrī Jākupiļs slimineicā nu giutuom traumom nūmyra 2,5 mienešus vacs zeidaiņs, kurš beja izsvīsts pa lūgu nu caturtuo stuova.
Aizvadeitejā dīnnaktī pazalelinuojuse kravys automašynu rynda iz Latvejis i Krīvejis rūbežys Terehovys i Grebņevys rūbežkontrolis punktūs. Terehovys rūbežkontrolis punktā šūreit izbraukšonu nu vaļsts gaideja 1100 kravys automašynys, kas ir par 200 vairuok nakai vakar. Sovukuort Grebņevys – 475, kas ir par 75 mašynom vairuok nakai vakar reitā.