Latgolys Radejis zinis (18.10.2007.)
Šudiņ tīslītu ministrs Gaidis Bērziņš gastei Latgolā, kab apmaklātu Latgulys apgoboltīsu, īpasazeitu ar Rēzeknis piļsātys dūmis i Bolvu zemisgruomotu nūdalis dorbu. Bērziņš planavoj arī puorrunuot aktualūs sadarbeibys vaicuojumus ar mynātajom īstuodem. Vakar ministram Reigā beja tikšonuos ar Latgolys Studentu centra puorstuovim.
Reit, 19. oktobrī parteja “Saskaņas centrs” (SC) pi Rēzeknis dūmis organizej mīteņu, kuramā riezeknīši planavuojuš izsaceit vīdūkli par nūteikūšū piļsātā ar sytumapguodis nūdrūšynuošonu, informej Saeimys deputata Jāņa Tutina paleidze Janīna Dukule. Paradzāts, ka mīteņā varātum daleibu jimt apmāram 50 cylvāki, īskaitūt SC puorstuovjus. “Mītiņš ir tautas prasīts. It kā beidzot apkure ir pieslēgta, taču kārtības ar siltumapgādes nodrošināšanu pilsētā nav, un iedzīvotāji vēlas zināt, kas un kāpēc notiek,” saceja Dukule.
Šudiņ divūs Rēzeknis rajona padūmē nūtiks diskuseja “Eirodzīve – kāpēc?”, kurā aicynuoti pīsadaleit Rēzeknis piļsātys i rajona školāni. Diskusejis vadeituojs profesors Igors Šuvajevs atkluoj, ka itū sarunu mierķis ir nūskaidruot, kas ir eirodzeive i voi myusu dzeivisveids atbylst eirodzeivis pricipim. Diskusejā pīsadaleis arī diveji eksperti – filozofe i Laterāna akadēmejis Reigys filiālis lektore Māra Kiope i atdzejuotuojs Uldis Bērziņš.
Šudiņ i reit pīredzis apmainis vizeitē Līpuojā īsarūn Daugavpils pošvaļdeibys Pilsātplānuošonys i byuvnīceibys departamenta speciālisti. Daugavpils pylsātplānuotuoji tiksīs ar kolēģim nu Līpuojis piļsātys Byuvvaldis i aptiemēs piļsātu. Daugavpilīši īpasazeis ar Līpuojis Byuvvaldis struktūru, darbinīku pīnuokumim, funkceju sadali i aktuālojom byuvnīceibys problemom Līpuojā.
Nu šudiņdīnys leidz 15. Novembram Dauvpils Universitātis Muokslys galerejā byus apskotoma Baltkrīvejis muokslinīku Aleksandra Karpana i Mihaila Ļevkoviča akvareļu izstuode.
Šudiņ trejūs Daugavpils dūmē tiks reikuota pījimšona, uz kuru aicynuoti Daugavpils spīdveja kluba “Lokomatīve” spīdvejisti, treneri i vadeiba. Itai pošvaļdeibys vadeiba grib pasasaceit sportistim i trenerim gon par sasnīgumim vysys sezonys laikā i izcīneitojom tīseibom startēt Pūlejis 1. līgā, gon arī par daleibu “Grand Prix” Daugavpils pūsmā i īguļdejumim tuo organiziešonā.
