Kaida leidzeiba suitim ar latgalīšim?
![](https://lpr.gov.lv/wp-content/uploads/2007/vysaidys/665.jpg)
Kai izaruoda suitim, piec apsavīnuošonuos leluokā nūvodā – piec nūvodu reformys, pīduovoj 10 tyukstušys latu jūs etnografejis saglobuošonai. Juopīkreit G.Rozentala kungam, ka piec itaidys leidzeibys tod jau i vysu Latveji varam pīvīnuot Krīvejai, par tū sajemūt kaidu papyldu finansejumu latvīšu folklorys sorguošonai.
Ari latgalīšim ir sova volūda, sova kultura i tei poša vaļsts, kas vysim puorejim latvīšim – Latveja. Ari mes, latgalīši, asom latvīši. Tak kūpā ar latviskū identitati myusim ir ari latgaliskuo identitate.
Tai pat kai syutim, myusim byutu juovaicoj piec sovys pošvaļdeibys, kurā mes ībolsojam sovus puorstuovus, kurai mes moksojam nūdūkļus i kurei īzeimej sova budžeta prioritatis – tys byutu vysstabiluokais ilgtermiņa garants latgaliskos identitatis idzeivuošonai ari iz prīšku. Mes navarm sovu atteisteibu baļsteit iz atsevišku projektu finansejumu, deļ tuo ka nav nikaidys garantejis, ka reit i pareit mes “izsissim” kaidu latu.
Nu molys kaidam var izalikt, ka latgalīši ir nazkaidi sveši i gryutai saprūtami… tak ar tū mes asom atškireigi, mes asom ituos vaļsts, ituos tautys, vysys Eiropys i ituo pasauļa boguoteiba.
Tik vaicuojums ari, cik eisti jaunu i aktivu latgalīšu ir Latgolā palics (vacumā 20-40 godim)? I, ka vēļ paskaita tūs, kas tikai sovu dzeivis vītu ir deklariejuši nazkur Latgolā, a dzeivoj i struodoj Reigā ci Īrejā, tod juoatzeimej, ka nikas lobuoks myus ari iz prīšku nagaida, ka mes poši nikuo nadarāsim.