Riezeknis dūme uorkuortas siedē lems par vītiejuos nūzeimis enerģetiskuos krīzis izsludinuošonu
Šudin pušdiņuos Riezeknis dūmis uorkuortas siedē deputati lems par vītiejuos nūzeimis enerģetiskuos krīzis izsludinuošonu Riezeknē. Vītiejū enerģetiskū krīzi saskanī ar lykumu var izsludynuot pošvaldeibas prīšksiedietuojs gadīņūs, kod enerģejas daguode traucāta taidā apjūmā, kas var apdraudiet dzeivuotuoju drūšeibu, veseleibu i tautsaiminīceibas nūzoru darbeibu.Šudiņ Briselē Leivuonu nūvoda dūmis puorstuovi prezenties pošvaldeibas sasnīgtū nūvoda i reģiona izaugsmis jūmā. Leivuonu dūmis puorstuovi daleisīs pīredzē par sešim beidzamajūs godūs realizātajim leluokajim projektim: Latgolas muokslas i omotnīceibas centra projektu, inženīrtehnoloģeju klastera izveidis projektu, kai arī projektim, kas saisteiti ar puorrūbežu basketbolu, veloturismu i migracejas politikas vaicuojumim.
Nu šudiņes da 12.oktobram Daugavpils universitatē nūtiks IV Baltejas Ģenetikas kongress. Plenarsiedēs i sekcejuos kongresa daleibnīkim byus īspieja nūzaklauseit ziņojumus cylvāka, dzeivinīku i augu ģenetikā. Tī ir golvenī ģenetikas virzīņi, kuramūs struoduoj Baltejas valstu zinuotnīki. Kongresā tiks skaiteiti referati par taidom aktualom temom kai ģenetikas atzynumu izmontūšona medicinā, dobys aizsardzeiba, dzeivinīku i augu šķirņu izlobūšona.
Šudiņ Latgolas apgoboltīsā pluonūts pasludynuot sprīdumu kriminallītā par 9.Saeimas vieliešonu biļetenu viltūšonu Bolvu rajona Kubulu pogostā, kuramā vīns nu apsyudzātajim ir arī bejušais pogosta prīšksiedietuojs i 9.Saeimas deputats Juris Boldāns. Lītā ir seši apsyudzātī i 50 līcinīki. Prokurore ir lyuguse Boldānam pīmārūt diveju godu cītumstruopi.
