Riezeknis augstškolā gasteis lektors nu Itālejas
Cytu nedeļ, 17.i 18.septembrī, Riezeknes augstškolā gasteis Milānas Universitatis funkcionaluos psiholoģejas profesors i Sanfrancisko Psihoterapejas Izpietis grupas lūcekls Marko Kazanota.Profesors Filoloģejas programmas studentim skaiteis lekceju ciklu par teksta analizi, eipašai izsverūt metaforu nūzeimi teksta analizis procesā. Lekcejas tiks pīduovuotas arī programmas “Speciālā pedagoģija” studentim.
Šudin i cytys divejis dīnas Daugavpilī nūtiks Dzejis dīnu pasuokumi. Šudin paradzātas Literatūras stuņdis pylsātas školuos i Latgolas dzejnīku atdzejojumu kūpkruojuma “Saulis spaiti iz spīgeļa” atdareišonas svātki, bet reit pīcūs vokorā Daugavpils Nūvodpietnīceibas i muokslas muzejā Ukrainas viestnīka Raula Čilačavas Raiņa i Aspazejas gruomotys “Trejkrāsainā saule” prezentācejas pasuokums, kuramā Raiņa i Aspazejas dzeja skanies gon latviskai, gon arī ukraiņu i gruzinu mieļī.
Saeimas Valsts puorvaldis i pošvaldeibas komiseja šudin vaicuos risinuojumus Latvejas-Krīvejas rūbežas šķārsūšonas vaicuojumā. Iz komisejas siedi ir izaicinuots satiksmis ministra padūmnīks tranzīta i loģistikas vaicuojumūs Georgs Lancmanis, īšklītu ministrejas, uorlītu ministrejas puorstuovi, Rūbežsardzis prīkšnīks Gunārs Dāboliņš i Ludzas rajona padūmis prīkšsiedietuojs Juris Dombrovskis.
Šudin turpinova pasalelinuot krovys mašinu ryndas iz Latvejas-Krīvejas rūbežas Grebņevas rūbežkontrolis punktā. Itamā reitā Grebņevā izbraukšonu nu valsts gaideja 540 krovys mašinas, kas ir par 60 mašinom vaira nakai ūtrdiņes reitā. Sovukuort Terehovas rūbežkontrolis punktā itamā reitā izbraukšonu nu valsts gaideja 600 krovys mašinas, kas ir par 20 mašinom mozuok nakai vokor.
