Lems par deputata pilnvaru izbeigšonu pyrms laika
Šudiņ Ludzys piļsātys dūmis sēdē skateis vaicuojumu par pošvaļdeibys deputata i prīkšsādātuoja vītnīka Frīdija Bokiša deputata pilnvaru izbeigšonu pyrma termiņa. Juoatguodynoj, ka Reigys piļsātys Centra rajona tīsā pārnuo goda 14.septembrī Generalprokuraturys Personu i vaļsts tīseibu aizsardzeibys departaments īsnīdze pīsacejumu par juridiska fakta konstatiešonu, ka Bokišs piec 1991. goda 13.janvara dorbuojīs Padūmu Savīneibys Komunistiskajā partejā.Šudiņ Jākubpiļa rajona slimineicā atkluos atjaunuotū operaceju bloku. Operaceju bloka renovacejai iztārātys 700 tyukstušys latu, nu kurom 500 tyukstušys sajimtys nu vaļsts budžeta. Atjaunuotais operaceju bloks apreikuots ar myusdīneigom mediciniskajom īkuortom. Atkluošonā daleibu jims veseleibys ministrs Vinets Veldre i citi ministrejis puorstuovji.
Rēzeknē, Raiņa īlā kaidā ākā izacēle guņsgrāks, kuo rezuļtātā būjā guoje 60 godus vacs veirīts, bet tik pat godus vaca sīvīte nūguoduota slimineicā, līcynoj Vaļsts guņsdzieseibys i gluobšonys dīnesta operatīvuo informaceja. Guņsnalaime nūtykuse pusnaktī i līsmys beja apjāmušys kaida ūtruo stuova dzeivūkli Rēzeknē, kurā daga matracs i greida 1 kvadrātmetra plateibā.
Itū pīkdiņ plkst 10.30. Daugavpiļs Bruoļu kopūs svineigai puorapglobuos elektreibys stuburu mainis laikā iz piļsātys dambja atrostuos Ūtruo pasauļa karā krytušū karaveiru miersteiguos atlīkys.
Šudiņ Dagdā turpynojās piļsātys statusa pīškieršonys 15 godu jubilejis pasuokumi. Vīņpadsmit stuņdēs Dagdys Rūmys katūļu draudzis bazneicā dīvkolpuojums i gareiguos muzykys koncerts.
