Vīns ci veins (“Dvēselis Remonta” ūtrei daļa)
Vīns ci veins
Ka latgaliski sokam “vīns, div, treis…”, tod daudzim puornūvodnīkim vysmoz pyrmais latgalīšu skaitlis izaklausa kai vysim labi zynoma dzierīņa nūsaukums. Par itaidu vuordu spēlem ir daže vairuokys anekdotis sacarātys:
Pierkn latgalīts draugam latvīšam kefiru i vaicoj: “Tev ari vīnu?” “Nē, vīnu vakar dzērām – šodien no tā vīna galva pušu plīst…” 😉
Pīteram ari sovā dzeivī beja gadiejīs i veina, i kuo cyta stypruoka nūgaršuot. Koč puišam i tikai divdesimt div godi, bet “pa draugam” ci “iz bādom” sadzarts kai ar klasis bīdrim, tai ar vīnkursnīkim… Atrads ar kū hvāstuotīs! Nā, Pīters nazalīleja par sovim pīdzeivuojumim pudeļonkys īspaidā – kauna vairuok pīzagruobovs deļ tuos dzyrys. Itamā gadejumā jis pierkn maizis, drusku dasys, mineraluo iudiņa, kaida rīksta (runoj, ka tī ir gona boguoti bareibys vīlom) i šokoladis – vyss paradzamajam diveju dīnu guojīņam iz Aglyunu. Pyrmū reizi tak īs itaidu gobolu – vāg byut piļneigā ekipiejumā. Juopajem ari leita mieteleiši, nu celefana saražuotī – vīgli i leita laikā ārti izmontojami.
Kaidā sakarā pyrmīt raksteits ari par grādeigajim? Tys deļ tuo, ka Pīters, daguojs da spirtuotūs dzierīņu plauktim, izdūmova, ka tūmār juopajem mozuo blaškeite “Piparu ryugtuo”. Tev varbyut liksīs – “nu vot, puiss svātceļuojumā īs, tak i tī navar bez gluozis iztikt!” Nā, na jau pīzadzert Pīteram pruotā – uorā drusku smydzynoj leits i ceļš prīškā tuoļejs. Kas zyna, kai vokorā byus? Varbyut izmierkušim i nūsolušim byus kaidā koktā juozamīdzās – taidā gadejumā drusku prostys medicynys navuodēs. 😉
I muļkeibys, ka latgalīši vairuok dzer kai cyti. Tī kas nūzadzāruš iz ituo pasauļa, jim vinolga, kur nūzadzert – ite ci kur cytur. A taidi, kam dzeivī ir svareiguokys lītys, jī ar itaidom vīlom uzmaneigi reikojās, it seviški, ka jau da itam ir drusku “apzasvylynovuš” i saprotuš, kas pa kam. 😉
Vysi tak tikai vīnaidi cylvāki asam. Tai ari latgalīši, reidzinīki ci kurzemnīki – Tu soki “veins”, jis soka “vīns”; Tu soki “vīns”, a jis jau skaita “viens, divi…” Skaņ drusku sovaižuok, a byuteiba nazamaina. Latgalīši tak ari ir taidi poši latvīši kai i vysi puorejī.
I kaida škierba – “čiuļs” ci “čangaļs” – ka byus leits, tai voi šai vysus celinīkus samiercēs… 😉
Nuokamais stuosts byus ar nūsaukumu Leits