Kuozinīku goroskops

Koč 7. goda 7. mieneša 7. datums jau cauri i puse Latvejis jau apsaženiejuse (i izguojuse pi veira), “Lakugys” skaiteituojim teik pīduovuota unikala i naaizmierstama vareiba īsapazeit ar kuozinīku goroskopu, kas dereigs ituo goda vosorai.
Eistais kuozu laiks jau vēļ tikai durovu prīškā – kod īkulta jaunuo maize i samolti mylti kuozu pluocinim.
Lai labi lūbās! Ryugts!

Vucyns (21. marts – 19. apreļs)

Grybeisi pasalaist slinkumā i atsapyust nu sīna laika dorbu, tok nikuo taida nasaīs – mārgom kuozuos byus daudz juoapdzīd puiši i puišim juoizdancynoj mārgys. Bazneicā naguli, cytaiž lelajā kuozu obrozā byus plečaini byudi.
Byus daudz vysakuo jauna, tok nasaver apleik kai vucyns iz jaunu vuortu. Piec mičuošonys gaidoma liktineiga īsapazeišona. Ļūbesteibys lītuos byusi apdūmeigs, tok napaej garom sovai pučei!

Teļš (20. apreļs – 19. majs)

Daudz runuosi, partū ka iz sirds byus daudz kas sasakruojs i kuozuos satiksi daudz lobu cylvāku. Natici vysim, kas tev maun ar golvu. Eistu klauseituoju pazeisi pa bolsam.
Loba veiksme slaukšonā, partū ka gūvs atdūs vysu pīnu. Lobs laiks kontaktu dybynuošonai i sadzeršonai ar biznesa partnerim. Ka veiksīs ar tū, iz prīšku duorzu vareisi apart pats pyrmais i sīna sapļaut laikā. Ļūbesteibys frontē vyss bez puormaiņu. Tok kuozu laikā satyktī ūtruos pusis rodi globoj daudz nūslāpumu. Var byut kaida liktineiga sasatikšona jau krystobuos!

Vui, cik daudz (20. majs – 20. juņs)

Troki namīreiga nakts. Skrīsi iz vysom pusem i rausīs deveņūs gobolūs. Pret reitu gaidoms liktineigs paviersīņs. Sorgoj saimineicu kuopustu kotlu kai sovu aci! Dasaver cytu nakuorteibu.
Piec kuozu cyti laimeigi dzeivuosīs pa sātu, a cyti otkon juos ar zyrgu apleik pa pasauli. Loba reize, kab nūpierktu kaidu nabejs lūpu. Var aizajimt naudu, vysi dūs iz poroda. Īsaļūbeisi godūs vacuokā pretejuo dzymuma puorstuovī.

Pūra trokais (21. juņs – 21. juļs)

Cīši daudz iessi i dzersi. Pīsasorgoj nu kuozu fotografa, partū ka juo obrozeņūs seve napazeisi! Raugi paruodeit sevi nu lobuokuos pusis, partū ka īgiutī kontakti var izaruodēt cīši nūdereigi piec laika. Kab teve naapdzīduotu, jau aiz laika atsapierc nu buobu i guodoj, kab jūs mutis nivīnu šaļti nabyutu sausys i tukšys.
Byusi deveigs i puorsteigsi jaunū puori ar nagaideitom duovonom. Ļūbesteibā atsakuopsi nu ījimtūs poziceju stypruoka pretinīka prīškā. Lobs laiks jaunu attīceibu dybynuošonai.

Strāšnais (22. juļs – 22. augusts)

Napatiks vysapleik asūšais trokums, partū ka kuozuos nabyusi vaļdinīks par situaceju. Tok nabādoj, tovys pozicejis otkon nūsastyprynuos jau tyvuokajā laikā. Tikai pacīteibu. Ļūbesteibys bādys nasleicynoj olā, napaleidzēs! Šmakovkā tože nā.
Koč jau mudri īs mīgs, byusi smaideigs i naizruodeisi cytim gostim sova apjukuma. Tiuleņ piec jaunuo puora guldynuošonys ej gulātu – redzeisi pravītyskus sapynus! Tik pīsasorgoj nu apzagšonys, guli ar vysu sukni!

Buoba (23. augusts – 21. septembris)

Kuozys ir tova stiheja. Jaunī ļauds jims nu teve pīmāru i doncuos tikpat trokai kai tu. Taipat teve labi īguoduos vacī ļauds – vysu vaira par tovu lobū sirdi i izpaleidzeigū rūku, laiceigi padūdūt jim rosola i studiņa bļūdys.
Koč apleik byus daudz jaunu cylvāku i cyta storpā tai i raudzeisi nūgiut vysšmukuokuos meitys voi vysbrašuokuo puiša acs, īguodoj par jau asūšom attīceibom. Na vyss ir zalts, kas speid, a sova kapeika lobuoka par cara rubli.

Spaņs (22.septembris – 22. oktobris)

Bīžai vysu kū jūceigu izdūmuosi i padareisi. Tovā ziņā i kuozinīku apzagšona, i montu izpuordūšona, i cyta uoveišonuos. Bez teve kuozom nabyutu ni tuo osuma, ni jautreibys. Daudz smīsīs i smīdynuosi cytus.
Puišim – vysys mārgys ir tovys, vysi puiši dusmēs treis zūbus i cyluos statiņa mītus. Meitom – ka esi buoba, to nasabeist. Tovam šarmam navarēs nūsaturēt pretim daža muzykanti. Cikom jī doncuos ar tevi, lai cyti kuozu gosti syt bubynu i raun iz garmanis!

Rupucs (23. oktobris – 21. novembris)

Kai troks byusi iz doncuošonys. Skrīsi apliek i byusi kuozu lobuokais gosts – tevi pazeis kotrys i kotrys turēs par pīnuokumu sadzert ar tevi kaidu čarku.
Tok iz nūpītnu lītu viersīs cīši vīglpruoteigai. Puišim – meilajai byusi gotovs nu dabasim zvaigznis nūnest, tok nasasūlej par daudz. Var saīt i izpiļdeit. Meitom – verīs, ka naīskrīņ taišni rūkuos sovam eistajam. Varbyut iz cyta gods byusi jau kuozu golda golā boltā suknē?

Metiejs (22. novembris – 20. decembris)

Byusi lels runuotuojs i lels dzīduotuojs. Byusi cīš atvārts cylvāks deļ vysu cytu, tik ni deļ sovejuos saimis. Lobuok ej ar kaidu doncuot, mozuok plēsnej pa koktim – kaidu spletņu i pļotku palaissi pa pasauli, taidys i atsagrīzs par tevi, apjuojušys puspasauļa!
Ka kuozu naktī aizīsi gulātu, var dasamest mienessierdzeiba voi nalaimeigi īsaļūbeisi pušvistī. Nikaida jauna īsapazeišona kuozuos nav gaidoma. Satiksi tik vacūs bryutgonus i bryutis. Pīmini senejū saciejumu, ka vaca ļūbesteiba naryus (ka jei nav jau sapyvuse)!

Ragaiņs (21. decembris – 19. janvars)

Eistyn troka byušona, byusi greizsirdeigs iz kotra, kas pasavērs iz tovys īcarātuos. Atlaid stričus i ļauņ lītom īt sovu ceļu. Lobuok attaisi acs i naļauņ eistajai ļūbesteibai paīt garom. Meitom – gaidi izdeveigys šaļts i nūstaigoj līku reizi garom pošam šmukuokajam puišam.
Nu vokora byus cīši ļusteigs pruots, ka nivīna dorba nagrybeisi dareit i pi golda navareisi nūsēdēt a ni sytams. Pagaidi koč, cikom jaunī ceļās nu golda! Nakts gara, izadoncuosi!

Šbaņkeļs (20. janvars – 17. febraļs)

Byusi lobs i labesteigs kai bolūdeits. Vacuos babys ar tevi vīn runuos i ap tevi viņ treisīs. Verīs, kab turātu leidza jom pi apdzīduošonys! Dagrīz viereibys, kuo ēd. Verīs ari, kab saimineicys naīdūtu kuozinīkim kuopustu vēļ pyrmajā dīnā i pyrms mičuošonys!
Ka vari, pīsasoki par ols puisi voi peirāgu daleituoju. Dabuosi daudz draugu i draudziņu. Daudzi kuozu laikā īs pi teve i stuosteis sovys bādys, esi saprūtūšs i prosi jim naudu. Naesi muoņticeigs i natici goroskopim, tys var izjaukt tovu ļūbesteibu.

Osoka (18. febraļs – 20. marts)

Dagrīzsi daudz viereibys muokslai, nūsaviersi jaunuokūs modu i sukņu. Ūtrajā dīnā cīši īs mīgs, partū ka da reita doncuosi i vysus gostus apzagsi i pyrms, i piec saulis lākta. Pi jaunuo puora mūdynuošonys bolsa nataupi! Ka kurs muzykants nūlyuzs, jem juo stabuli i pyut.
Nikaida lela struoduotuoja nu teve jaunnedeļ nabyus, deļtuo dorba kolegys iz teve byus cīši sirdeigi. Naklusej, izarunoj ar jim i pastuosti, kai juosviņ rikteigys latgalīšu kuozys!