Referendumā vysnaaktivuokī beja kruoslovīši
![](https://lpr.gov.lv/wp-content/uploads/2005/dezuratteli/79.jpg)
Šudiņ Rēzeknis rajona padūmis siežu zalā nūtiks seminars, kuramā interesenti tiks īpazeistynuoti ar itūgod veiktuo pietejuma – par cylvākresursim Daugavpilī, rezuļtatim i sacynuojumim, kurā apkūpuoti taidi vaicuojumi kai cylvākresursu veiduošonuos dorba tiergā, informacejis aprite, cylvākresursu veiduošonuos Austrumlatgolys dorba tiergā.
Šudiņ Daugavpiļs tīsa planoj skateit Daugavpiļs kopu apguoneituoju lītu i kriminallītu par zagšonu, kuramuos, kai aizdūmuos turamuos personys figurej vīni i tī poši jaunīši. Par kopu apguoneišonu apsyudzāti divi 15, vīns 16, i vīns 14 godus vacs jaunīts.
Preiļu piļsātys svātkūs 21. julī tiks pasnīgti Atzineibys roksti Preiļu nūvoda uzjiemiejim, īstuodem i navalstiskajom organizacejom par palīkūšu īguļdejumu Preiļu piļsātys atteisteibā. Preiļu nūvoda Atzineibys rokstu sajimšonai pīsaceitys 18 kandidaturys.
Preiļu rajona Rībeņūs 28. julī nūtiks nūvoda dīna “Ja muns kaimiņš dzeivuos labi, tod arī es dzeivuošu labi”, tymā paradzāta plaša kulturys programma vysom paaudzem. Rībeņu parka estradē paradzāts omotnīku, rūkdarbnīku tierdzeņš, nūvoda uzjiemieju produkcejis nūgaršuošona, nūvoda i gostu pošdarbeibys kolektivu koncerts, juošona ar zirgim i vyzynuošonuos ar droškom, byus rodūšuos darbneicys, dažaidys atrakcejis i spēlis bārnim.
14. julī Daugavpiļs rajona Leiksnā nūtiks jau trešais “Muzykys Skrytuļs”, bet piyrmys tam – šudiņ Reigā, Līvu laukumā kafejneicā “Pībolgys duorzs” nalels īskanis koncerts. Pīsadola “Green Novice”, “Maskačkys Spielmaņi”, “Inde Indive” i “Dabasu Durovys”.