Burteņš B (Volūdys Vaicuojums)
XVIII
Loba dīna!
Parunuosim par burteņa b izplateibys arealu myusdīnuos mozuok lītojamūs vuordūs. Pyrma suoksim ar dažu skaneigu vītu vuordu nūsaukšonu. Īsaklausit: Babri, Baļbinova, Baļtinova, Bambāni, Bikernīki, Bokuoni, Bolvi, Borkova, Brodaiža, Breidaki, Bukmuiža, Buoleni, Buozova…
Niu pīminēsim kaidus augu nūsaukumus! Vysim labi pazeistamī buraceni voi batvineiši, nu kuru suortums i veseleiba na viņ cylvāka sejis dalis byudūs pasagluobs. Taipoš slovonuo nazuole buolyudine ir tei poša vysim tik labi pazeistamuo balanda, kura cīši labi var papyldynuot vitaminu davu pavasara salatūs. Sovpateigs augs ir ari bezdeleigu lizeicenis voi teiruma atraitneitis, taipoš ari smuordeigī baduni voi pūra vaivareni i cereni voi besakūki. Tod vēļ būneja – geraneja voi mušketers.
Boika, boiceņa ir svīsta kuļamais trauks, būrte – motūs sīnamuo lenta, ari jūsta.
Bazvyns ir svori , a britvans – capamuo ponna, Bačs ir jauns audakla rulleits, Baraks ir tai saucamuo cauruo guba – konusveideiga kaudzeite labeibys voi sīna kaļteišonai.
Beraks ir puika, beruki – bārni, besētīs – trokuot.
Birnavuot – ir īsvieteit, a braščuks – procesejis daleibnīks katuoļu dīvkolpuojumā, a bričkys, gaptys, spicis, knipelis ir mežginis.
Brika, briška – ir ore (vēļ daļžons,tarantass), Brile ir platmale, a brist zivs – zvejuot zivs.
Bruolinīks ir bruolāns, a brīdaklys – pļuopa. Bagars ir gon īreice ūgu laseišonai, gon muorku teiramais (bagarēt – teirēt),
Baļva ir baļļa, vēļ abra. Blise ir pliņte, a būgons – vijūlis lūceņš.
Bradiņs – ratynuotūs velkūs austa drēbe teiklam, divbrids.
Buļvinīks ir nalela ieceņa guļbeišu i sakņu globuošonais, a buļbaite – nūrokts kartupeļu lauks.
Sovukuort burnass, burnaseņš ir rudiņa mieteļs, žakete.
Blīni ir pankūkys, blyugžuons – ryugušpīns, a buobine – baka.
Bīzineica ir mīžu bīzputra, kuru vuoreja tikai apsiejeibuos.
Bygucs ir Gavieņa laika iedīņs nu pīstā sagryustu guļbu, pupu i lynsāklu eļlis. Pamieginuosim taidu sataiseit! Vysmoz izaklausa veseleigai i ari tuo sastuovdalis nav nu aizjiurys zemu juogodoj, a vys atrūnams tepoš myusu duorzūs izaudzātuos produkcejis sarokstu pyrmaja ailē.
Vysu lobu!