Bez tēmas 

Suoc gataveitīs tautys nūbolsuošonai

Šudiņ dorbu suoks tautys nūbolsuošonys īcirkni. Da tautys nūbolsuošonys dīnai, 7.juļam, vieliešonu īcirkni byus atdareiti četrys stundis dīnā, i tymūs varies dasaceit bolsuošonu vielietuoju atsarašonuos vītuos, īsapazeit ar Vaļsts prezidentis Vairas Vīķes-Freibergas apturātajim grūzejumim Nacionaluos drūšeibys lykumā i Valļsts drūšeibys īstuožu lykumā i bolsuošonys kuorteibu. Itamuos desmit dīnuos vieliešonu īcirkņūs bolsuot navaries, deļ tuo ka tautys nūbolsuošona taipat kai parlamenta vieliešonys nūteik tikai vīnu dīnu (7.julī).


Vakar iz Draudzeibys festivalu Norvegejis piļsātā Averojā devusēs Jiekabpilļs rajona delegaceja. Draudzeibys festivalā īkļautys oficialuos omotpersonu tikšonuos, bārnuduorza i pansionata apmeklejums, koncerts bazneicā, fotomuokslineicys Daigas Kalniņas dorbu izstuodis atkluošona i cytys aktivitatis.

Reit i pareit, Daugavpilī nūtiks starptautiska konference “Latveja – tylts storp Eiropas Savīneibu i Naatkareigū valstu savīneibu. Uzņiemējdarbeibas perspektīvas Latgolā”. itei byus pyrmuo itaida mārūga konference, kuramā pīsadaleis Krīvejis i cytu vaļstu uzjiemēji, kuri gotovi runuot par konkretim sadarbeibys projektim. Latveju itymā forumā puorstuovēs kaidi 50 uzjiemieji i politiki.

Rēzeknis augstškolā beidzamūs kursu studentim eksameni jau ir beigušīs i absolventi gatavejās izlaidumim. Kūpā itugod studejis beigs 624 Rēzeknis augstškolys studenti, nu tim pylna laika studejis – 306 studenti, bet napylna laika studejis – 318 studenti. Šudiņ izlaidums nūtiks Pedagogejis fakultatis studentim.

SIA “Šlokenbeka” jaunuo mobiluo asfaltbetona ražūtne “Ammann Black Move” dorbu suoks 1.julī. Jaunuos asfaltbetona ražūtnis jauda ir kaidyas 150 -160 tonnys stuņdī, da 70 tyukstūšom tonnu godā. Niu ražūtne atsarūn Īcovā, bet augustā ryupneica tiks puorvītuota iz Terehovu, kur uzjāmums pīsadaleis regiona tranzita ceļu byuvdorbūs. Kūpumā goda laikā planuots ryupneicys atsarasšonys vītu maineit divejis da treis reizis.

Beidzamajā dīnnaktī drupeit sazamozynuojuse kravys mašynu rynda iz Latvejis i Krīvejis rūbežys. Itūreit Terehovā izbraukšonu nu vaļsts gaideja 500 kravys mašynas, kas ir par 20 mašynom mozuok nakai vakardīnys reitā. Sovukuort Grebņevys rūbežkontrolis punktā itureit ryndā gaideja 135 kravas mašynas, kas ir par 25 mašynom mozuok nakai vakar. Jau ziņuots, ka 30.majā Terehovā ryndā gaideja 1500 kravas mašynas. Tei beja da šam garuokuo rynda.

Šudin Kruoslovā nūtiks seminars, kuramā interesentus īpazeistynuos ar itūgod veiktū pietejumu par cylvākresursim Daugavpilī. Pietejums veikts, kab īgiutu kvalitativu statistiku i analitisku informaceju par situaceju i atteisteibys tendencem dorba tiergā Daugavpilī i Daugavpišs ītekmis teritorejā – Daugavpiļs, Kruoslovys i Preiļu rajonā. Itū informaciju planuots izmontuot nūdorbynuoteibys problemu rysynuošonai. Īsapazeit ar pietejuma rezultatim aicynuoti pošvaļdeibu darbinīki, izgleiteibys īstuožu puorstuovi, dorba devieji i cyti interesenti.

Laika prognozs šudiņ Latgolā. Dīnā: muokūņains laiks, šaļtim skaidruosīs. Vītom nalels eislaiceigs leits, pārkiuņa nagaiss. Dīnvidrītumu viejš 4-9 m/s, brazmuos da 13 m/s. Maksimaluo gaisa temperatura +16…+20°.