Školnīki gotovi moksuot

Straujai tyvojūtīs eksamenu laikam, interneta portalūs i forumūs aktualizejusēs 12.klašu eksamenu aizdavumu tierdznīceiba. Tai interneta portalūs īlikti sludynuojumi, kurūs izsaceita gryba par attīceigu samoksu dabuot vysaidus eksamenu aizdavumus. Puorsvorā par eksamenu aizdavumu kopejom nu originala teik aizpraseiti nu 100 da 300 latu.

Kab akcentietu vajadzeibu nūsliegt dorba leigumu, Valsts dorba inspekcija šudiņ Daugavpilī organizej informativu kampani “Dorba leigums struodoj!” Kampanis laikā da 1.juņa vairuokuos Latvejis piļsātuos gasteis Valsts Dorba Inspekcejis informativuos teltis, kuramuos sevkurs varies sajimt izgleitojūšus materialus par tū, kū nūdrūšynoj nūslāgts dorba leigums, kampanis suvenirus, kai ari bezmoksys jurista konsultaceju.

Šudin Rēzeknē, Nacionalūs bīdreibu kulturyas nomā, nūtiks IX piļsātys pyrmsškolys izgleiteibys īstuožu bārnu teatru festivals “Bērnu spēles prieks”. Itugod festivalā pīsadaleis 11 bārnuduorzu audziekni. Pasuokuma tematiskuo īvirze itugod ir “Vasalā mīsā vasals gors”.

Nu šudinis da 25.majam ar izruodem “Piec leita…” Daugavpiļs cītūksnī gasteis ceļojūšuo cyrka kompaneja nu Francejis piļsātys Marselis. Izruode “Piec leita…” ir ospruoteigs stuosts par dzeivi cyrka vagoneņūs. Virtuozys i franciskys dzeivuos muzykys pavadejumā žongleri gatavej vakarenis, jaunuo mameņa dzygoj iz viervis, meitinis aizmīg kuojom gaisā, bet puiši kai šautrys kreit nu dabasim. Pusūtrys stuņdes laikā teik saburta atmosfera, kas skateituojim i muokslinīkim ļaun justīs kai naporostai saimei.

Šudin Daugavpiļs Universitatis rektora omota kandidati tiksīs ar augstškolys personalu i studentim, īsapazeistynuos jūs ar sovom pīduovuotajom Daugavpiļs Universitatis vadeibys programmom i atbilļdies iz vaicuojumim. Jau ziņuots, ka Daugavpiļs Universitatis rektora omotam pīteikti diveji kandidati: profesors Arvīds Barševskis i profesore Ilga Salīte.

Laika prognozs šudin Latgolā. Daleji muokūņains laiks. Dīnā austrumu rajonūs nalels eislaiceigs leits, pārkiuņa nagaiss. Zīmeļrītumu, rītumu viejs 5 – 10 metri sekuņdī, pārkiuņa laikā bruozmains. Maksimaluo gaisa temperatura dīnā +20; +23.