Atsasaukt iz aicynuojumu!
Žurnala „Katōļu Dzeive” maja numura vadmotivs ir sīviškuo zeime, gon Muotis Bazneicys, gon myusu mīluos Dīva Muotis, gon kotram sovys muotis… Tei myusus ir pavadejuse vysu maja mienesi i cīši labi sader ari ar patīsys mīlesteibys zeimi. Taidys, kura spiej īveikt škītami naīveicamū.Kaidu breinumjauku materialu par itom izjiutom varim izlaseit žurnala 10.lpp. i tys saucās „Tu esi muna sauleite”. Rubrikā „Tovam repertuaram” īsavērsim „Aglyunys nakts adorantu dzīsmis” pyrmpubliciejumā. Sovukuort Nabadzeiguo Bārna Jezus kongregacejis muosa Mirjama ir gastejuse Beļgejā i sovā rokstā stuosta par tū, kai piļsietenis Bannē īdzeivuotuojai 11-gadeigajai meitinei Mariettei pasaruodejuse Dīva Muote.
Cīši sirsneigys i aizkustynūšys ir tukumneicys, žurnalistis Veltys Veirenis atminis par tāvu Viktoru Pentjušu. Itymā numurā izskaņ ari atvodu vuordi prelatam Kazimiram Ručam i dzejnīkam Ontonam Kūkuojam. Teik turpynuots materials par mormonim, ari viestejums par myusu slovonū gruomotu izdevieju Vladislavu Luoci.
Cīši rūsynūšs i uzmundrynūšs ir itymā numurā iņtervejamuos saimeitis tāva Ulda Lubāna atzynums: Munā dzeivē ir daudz kas sasnīgts, gon dorbā, gon sadzeivē. I vyss, pasateicūt Dīva vadeibai, navys vodūtīs piec muna plana. Dīvs pīduovoj īspiejis, es ceņšūs iz tom atsasaukt i pīlīku pyulis. I tod vyss izadūd.”
Prīks ir ari par Latgolys jaunū paaudzi – daillaseituoju konkursa „Vuolyudzāni” i vydusskūlānu olimpiadis daleibnīkim. Lai jim vysim gaišys dūmys i uzjiemeiba ari turpmuok spūdrynuot gon runuotū, gon raksteitū vuordu! Žurnala loppuseitēs izskaņ ari aicynuojums pīsadaleit gon itūvosor Rogovkā reikuotajā storptautiskajā seminarā jaunīšim, gon „Muzykys Skrytulī” Leiksnā.
