Vysi Rēzeknis absolventi – vīnuoti Latvejai
Tradicionali Rēziknis piļsātys 12.klašu školāni aicynuoti iz svineigu pasuokumu pi pīminekļa „Vīnuoti Latvejai”. Ite kūpā saīs 520 absolventi, kurus sveiks piļsātys dūmis deputati, Izgleiteibys puorvaļdis vadeiba, školu direktori, školuotuoji i klašu audzynuotuoji, kai ari školāni poši saceis runu. Jaunīšus uzrunuos i sovu svieteibu dūs Rūmys katuoļu bazneicys Rēziknis – Aglyunys diacezis veiskups Juoņs Buļs.Nu šudinis leidz 26. majam, projekta „Panorama Dvina/Daugava” itvorā Daugovpiļs piļsātu i Daugovpiļs rajonu apcīmuos upis autobuss. Upis autobuss ceļu iz Latveju veics nu Zvīdrejis. Kotrs interesents, kas klius par „pasažiri”, ikuopjūt autobusā, dazynos daudz aizraujūšu lītu par Daugovu, kulturviesturiskū montuojumu tuos apleicīnē, kai arī par senejūs vikingu kugneiceibys ceļu „Nu varjagim leidz grekim”. Autobusa ekspoziceja i gida stuostejums viesteis par Boltkrīvejis, Zvīdrejis i Latvejis kūpegajom i atškireigajom kulturys vierteibom. Autobusa prezentaceja nūtiks šudiņ pl.16:00 vokorā Daugovpiļs Vīneibys laukumā.
Jākubpiļs buoriņu nomā „Leikumi” tiks izveiduots krizis centrs audžu saimem. Centra izdavums byus snīgt specialistu konsultacejis i atbolstu audžu saimem i bārnim; aizbildnim, bārnim, kas atsarūn aizbildneibā, adoptātuojim i saimem krizis situacejā. Krizis centra izveide izmoksoj gondreiž 12 tyukstūšys latu. Daļu naudys pīškieruse Bārnu i saimis lītu ministreja, bet daļu pošvaļdeiba.
Nu šudinis leidz 20.majam Daugovpiļs Universitatē nūtiks starptautiskuo zynuotniskuo konference XII Slāvu lasiejumi. Konferencis golvonais mierkis – īpazeistynuot daleibnīkus ar jaunuokajim slāvu kulturys pietejumim folkloristikā, literaturzynuotnē i volūdnīceibā. Konferencē pīsadaleis 36 zynuotnīki nu Boltkrīvejis, Igaunejis, Krīvejis, Latvejis, Lītovys, Pūlejis i Vuocejis.
