Zaļuoka Latgola, zaļuoka Eiropa
![](https://lpr.gov.lv/wp-content/uploads/2005/dezuratteli/79.jpg)
Rēzeknis tīsā šudiņ pasludynuos lāmumu skateitajā kūlys dadzynuošonys lītā, kuramā apsyudzātuo nav pīkrituse apsyudzeibai i apgolvuoj, ka dadzynuojuse pārnūs lopu kaudzi, navys kūlu. Šūgod Rēzeknis tīsa par pārnuos zuolis dadzynuošonu jau pīsprīduse administrativuos struopis pīcom personom.
Daugavpiļs Universitatē 49.reizi nūteik jaunūs zynuotnīku konference. Konferencei daleibu pīsacejuš vairuok nakai 170 daleibnīki nu dažaidim Latvejis rajonim. Itaida veida konference pīduovoj īspieju studentim, kuri roksta bakalaura i magistra dorbus, īsapazeit ar cytu studentu pīredzi, kai ari cytus īpazeistynuot ar sovu pīredzi.
Reit 40 bārni nu Viļānu piļsātys moznūdrūšynuotajom saimem Reigā apmeklēs Latvejis Nacionaluos operys baleta izruodi “Pelnruškeite”. Īspieja pabyut Reigā i apmeklēt baleta izruodi bārnim teik duovynuota ar Reigys Samarīšu apvīneibys i Latvejis Nacionaluos operys atbolstu.
Daugavpilī turpynojās 3.starptautiskais pūļu folklorys festivals “Pūļu folklora Latgalē”. Šudiņ 10 stuņdēs festivala pasuokumus īvadeis Pasaulis pūļu dīnai veļteits dīvkolpuojums Svātuos Jaunovys Marejis bazneicā, divuos stuņdēs Pūļu sātā atkluos pūļu izcelsmis muokslinīka Juzefa Vežana dorbu izstuodi, bet pīcūs Vīneibys laukumā paradzāts svātku koncerts.
Daugavpils tierdznīceibys parks “Solo” aicynoj bārnus pīsadaleit zeimiejumu konkursā “Muns meiluokais puorsoku tāls”. Kai informej kompanejis “13. Stuovs” projektu vadeituojs Viesturs Rencis, piec lobuokuo zeimiejuma tiks veiduots lelais plakats, kas vosorā graznuos tierdznīceibys parka “Solo” centralū īeju.
Vaļsts kulturkapitala fonds ir atbaļstejs jaunīšu nūmetnis projektu “Izgleitūjūša tradīceju vosorys škola”, kū izstruoduoja i organizej Rēzeknis rajona padūmis izgleiteibys puorvaļde. Nūmetne nūtiks nu 11. da 15. juņam Rēzeknis rajona Tiskādūs. Tai var pīsasaceit vydsškolys vacuma jaunīši gon ar dziļom zynuošonom, gon bez prīkšzynuošonam folklorā i latviskajuos tradicejuos, jo, golvonais ir gribiešona apgiut jaunys zynuošonys i prasmis.