Školāni īstudej “Maiju un Paiju”

Šudin Daugavpiļs Krīvu vydsškolys-liceja aktu zalā nūtiks Annas Brigaderes puorsaku lugys “Maija un Paija” īstudejuma konkurss, kuramā školu komandys saskanī ar izluozi spielēs kūpā ar sovim latvīšu volūdys školuotuojim īstudietuos lugys “Maija un Paija” ainys. Rakstnīces 145.dzimšonys dīnai velteitamā pasuokumā pīsadaleis ap divejim symtim 6.-8.klašu školānu nu septeņpadsmit Daugavpiļs školom.

Rēzeknis dūmis izsludynuotamā atkuortuotojā konkursā iz vakantū dūmis izpylddirektora omota vītu papildlaikā pīzateikuš vēļ četri pretendenti, i tai dūmē izviertēs sešys kandidaturys.

Šudin Rēzeknis dūmis Infrastrukturys i atteisteibys komitejis sēdē tiks izviertāti pretendentu pīteikumi i nūtiks atlasis pyrmuo kuorta. Īprīškejī treis omota kandidati, kurī beja pīsateikuš izpylddirektora vakancei, natyka atbalsteiti deļ tuo, ka dūmis vadeiba itamā omotā gryb darbinīku ar lobom tehniskajom zynuošonom.

Šudin Jelgovu apmeklies Daugavpiļs pošvaldeibys i Naturalizacejas puorvaldis nūdalis puorstuovi. Jelgovys Sabīdreibys integracejis centrā gasteis Daugavpiļs dūmis prīšksiedietuojis vītneica Eleonora Kleščinska, Naturalizacejis puorvaldis Daugavpiļs regionaluos nūdalis vadeituojs Jānis Bružiks i nūdalis darbineica Ilze Ondzule, kab īsapazeitu ar Jelgovys pošvaldeibys pīredzi etniskuos integracejis jūmā, ar nacionalū kūpīnu dorbu i naturalizacejis procesa gaitu pilsātā.

Šudin Kruoslovā suokas nūvoda dūmis izsludynuotuo Spūdreibys nedeļa. Pīsadaleit aicynuoti vysi nūvoda uzjāmumi, īstuodis, školnīku i studentu organizacejis. Akcejis reikuotuoji tic ari iz daudzdzeivūkļu nomu i privatuo sektora dzeivuotuoju atsauceibu pogrobu i sātom pīgulūšū teritoreju sakūpšonā.

Šudin slīžu remonta laikā dzelzceļa pūsmā Vabale-Leiksna maineits Daugavpiļs vilcīņu kusteibys grafiks. Remonta laikā nakursies dīzeļvilcīņs Reiga-Daugavpiļs ar atīšonys laiku 13:00, kai arī Daugavpiļs-Reiga ar atīšonys laiku 13:07. Slīžu remonta laikā dzelzceļa pūsmā Vabale-Leiksna maineits Daugavpiļs virzīņa vilcīņu kusteibys grafiks leidz 26.apreļam.

Laika prognozs šudinei Latgolā. Dīnā muokūņains laiks. Piecpušdinē šaļtim nalels leits. Dīnvydu, dīnvydrītumu viejš 3-8 metri sekuņdī. Maksimaluo gaisa temperatura +7..+11.