Lekceja par tautys nūbolsuošonu

Rēzeknis augstškolā 19.aprelī nūtiks lekceja par tautys nūbolsuošonu, jo teik vuokti paroksti tautys nūbolsuošonys īrūsynuošonai par apturātajim lykumim. Atkluotuo lekceja nūtiks Atbreivuošonys alejā 115, Humanitarūs zynuotņu fakultatis i Pedagogejis fakultatis ākā, aktu zalā (suokums pl.15:30). Lekceju skaities i iz vaicuojumim atbiļdēs Rēzeknis augstškolys asocietais profesors Zigurds Mikainis.

Šudiņ Daugavpiļs Vaļsts gimnazejā nūtiks konference “Daugavpiļs Vaļsts gimnazejis pedagogu pīredze: mekliejumi i īgivumi”. Konferencē planuots runuot par logistikys elementu pīlītuojumu, ilgtspiejeigys izpratnis atteisteibu vydsškolā caur integrātajim vuiceibu projektim, vuiceišonuos tehnologeju apgivi vuiceibu procesā i vuiceibu sasnīgumu viertiešonys kriterejim biologejā.

Šudiņ Rēzeknis pošvaļdeibys darbinīki sadarbeibys i pīredzis apmainis braucīņūs gastej Pleskovā. Kab puorrunuotum turpmuokuos sadarbeibys īspiejis i vīnuotūs par kūpejū projektu sferom, iz Pleskavu dūdās Rēzeknis Dūmis delegaceja – dūmis prīšksādātuojs Juris Guntis Vjakse, dūmis deputati Jurijs Petkevičs i Anatolijs Pušņakovs, kai ari Atteisteibys puorvaļdis „Rēzeknes Biznesa centrs” Uorejūs sakaru nūdalis vadeituoja Sandra Jonikāne. Kai Latgolys Radeju informej Rēzeknis piļsātys dūmis sabīdriskūs atteiceibu nūdalis vadeituoja Diāna Zirniņa Pleskovā pošvaļdeibys delegaceja uzaturēs da 19.apreļam.

Šudiņ Profesionaluos karjerys izvēlis vaļsts agenturys Daugavpiļs kabineta telpuos nūtiks starptautisks seminars par karjerys izvēli. Piec Baltejis vaļstu īsastuošonuos Eiropys Savīneibā mudri pasalelynuojs itū vaļstu dorba tiergs i snīdz cylvākim jaunys īspiejis. Deļ tam svareigai ir paļeidzēt jaunīšim profesejis izvēlē. Seminarā piļsātys školu svešvolūdu školuotuoji, školu psihologi i profesionaluos orientacejis konsultanti īgius informaceju par pīaugušūs vuiceibu centrim, kai ari īsapazeis ar Šauļu specialista pīredzi karjerys vaicuojumūs

Šudiņ pecpušdiņē (pl.14:00) Rēzeknis valsts gimnazejā nūtiks Rēzeknis piļsātys izgleiteibys īstuožu pedagogu rodūšūs dorbu konference. Teik aicynuoti pīsadaleit vysi radūšūs dorbu autori, izgleiteibys īstuožu pedagogi nu Rēzeknis piļsātys školom i pyrmsškolys izgleiteibys īstuodem. Konferencē pīsadaleis arī Rēzeknis augstškolys prorektore vuiceibu dorbā, asocietuo profesore, filologejis zynuotņu doktore Angelika Juško-Štekele ar lekceji – zynuošonu i prasmju attīksmes pedagoga kreativajā dorbeibā.

Rēzeknis Augstškolā, Atbreivuošonys alejā 115 aktu zalā, animacejis filmu studejis Dauka zeimātuos animacejis filmys “Spielieju doncuoju” pyrmizruode i tikšonuos ar filmys veiduotuojim. Filmys pamatā ir grupys “Iļģi” muzyka piec Raiņa lugys motivim. Tei ir simboliska mīlesteibys misterija, kurā pīdzeivuojumi rysynojās gon iz zemis, gon ari pazemē – rogonu, valnu i dažaidu fantastisku byutņu vydā.