Moskovys vadeibys puorstuovi gastej Daugavpilī

Šudiņ (13.04.2007.) Daugavpili apmeklēs Moskovys vadeibys ministrs Vladimirs Mališkovs. Ministrs planuojs tiktīs ar Daugavpiļs dūmis prīkšsādātuoju Ritu Strodi i puorrunuot dažaidus aktualus vaicuojumus. Mališkovs apmeklēs Daugavpili Moskovys vadeibys delegacejis vizitis laikā.

Latgolys apgoboltīsa šudiņ paradzātū kriminallītu par 9. Saeimys vieliešonu biletenu vyltuošonu Bolvu rajona Kubulu pogostā, kuramā vīns nu apsyudzātajim ir ari bejušais pogosta prīkšsādātuojs Juris Boldāns, vysdreižuok, naskateis, jo nu Augstuokuos tīsys nav sajimti lītys materiali.

Daugavpilī šudiņ trejuos stuņdēs Pūļu nomā nūtiks Informacejis dīna Daugavpiļs etniskajom bīdreibom. Informacejis dīnā kotra bīdreiba informēs kluotasūšūs par svareiguokajim sovys bīdreibys pasuokumim 2007.godā. Informacejis dīnā byus puorstuovātā latvīšu, latgalīšu bīdreiba, krīvu, pūļu, ebreju čiguonu, boltkrīvu, lītovīšu, vuocu, ukraiņu, tataru bīdreiba i Latgolys Studentu centrs.

Preiļu nūvoda dūme itū sastdiņ aicynoj Preiļu nūvoda fiziskūs aktivitašu cīneituojus pīsadaleit dūmis reikuotajā skriejīnī pilsātys īluos “Preiļu ceiruļputeņs 2007”. Skriejīnī dreikst pīsadaleit sevkurs daleibnīks, kas uzajem atbildeibu par sovu veseleibu skriejīņa laikā. Sacenseibu suokums divpadsmitūs pi Preiļu nūvoda dūmis. Maršruts nūsaceits pa Raiņa bulvari, Paulāna i Aglyunys īlu, atsagrīžūt Raiņa bulvarī.

Cikom Ludzys rajonā pi Krīvejis rūbežys krovys transportleidzekļu skaits ir īvāruojamai sazamazynuojs, teik veikti ceļu nūmaļu sakūpšonys dorbi. Vītuos, kur stuovēja kilometru desmitim garuos kravys auto ryndys, daudzvīt ir izbrauktys ceļu nūmalis, jo transporta kusteiba nūtyka pa vīnu ceļa jūslu i nūmali. Itamā šaļtī ryndu nav, i ceļu uzturietuoji veic ceļa nūmaļu “planiešonu” i samaituotū vītu “pībieršonu”.

Rēzeknis zonalajā valsts arhivā šudiņ suoksīs Rēzeknis rajona školu komandu konkurss “Izzynoj Latgolys nūvoda viesturi”. Pyrmais kluotīnis konkurss byus par Padūmu laika viesturis vaicuojumim. Konkursā pīsadaleis Viļuonu, Kaunatys, Dricānu, Nautrānu vydsškolys i Sakstagola, Jaunstružānu pamotškolys.

Šudiņ Daugavpiļs dūmis lelamā zalā 40 Daugavpiļs piļsātys i 5 rajona dzeivuotuoji sajems Ministru kabineta reikojuma izrokstus par uzjemšonu pilsūneibā naturalizacejis kuorteibā. Kūpā ar vācuokim pilsūneibu īgius ari diveji bārni.

Šudiņ Daugavpilī, Kulturys i sporta pilī, nūtiks konkursa “Persona 2006” nūslāguma pasuokums. Premeju “Persona 2006” planuots pasnīgt ostoņuos nominacejuos: kultura; medicina; igleiteiba i zinuotne; ekonomika; lobdareiba i socialuo sfera; gluobšonys dorbi; sports; muoksla, muzyka i literatura. Premejis pīškiers Daugavpiļs i Daugavpils rajona īdzeivuotuojim par nūpalnim piļsātys i rajona atteisteibā. Premejai “Persona 2006” pīsaceiti 68 pretendenti.

Reit Jākubpiļs piļsātys dūmis darbinīki pīsadaleis piļsātys sakūpšonys tolkā, plānuots sakūpt Piļs mikrorajonu.

Šudiņ Kruoslovys kulturys nomā nūtiks Kruoslovys rajona dramatiskūs kolektivu saīts “Bolts čapāslys ver odotā dīgu”
Ar īstudejumim saītā uzastuos Grāveru, Andzeļu, Varnaviču, Indrys, Skaistys, Dagdys, Konstantinovys, Svareņu i Kruoslovys tautys i kulturys nomu dramatiskī kolektivi.