Tranzita transporta īspiejis Latgolā

Daugavpilī, vīsneicā “Park Hotel Latgola” nūtiek starptautiska konference “Transports i logistika – problemys i īspiejis”. Vīns nu golvonajim konferencis mierkim ir nūdrūšynuot īspieji obu valstu īinteresātajom personom – puorvaldis, zynuotnis, transporta, logistikas i cytu jūmu puorstuovjim apsamainēt redzīnim par problemom, kas saisteitys ar Latvejis i Krīvejis pīrūbežys teritoreju atteisteibu, kas atsarūn magistralis Sanktpeterburga – Luga – Pleskava – Ostrova – Rēzekne – Daugavpiļs tīšā tyvumā.

Preiļūs dorbu suoks Centraluos statistikys puorvaļdis izveiduotais Telefoninterveju centrs, kura darbinīki dažaidu apsekuojumu gaitā veiks Latvejis īdzeivuotuoju aptaujis, izmontojūt teleponu. Itaida teleponinterveju prakse ir plašai izplateita Eiropys Savīneibys vaļstīs. Starp Baļtejis vaļstim Latveja byus pyrmuo, kura statistikys īstuodis datu apkūpuošonai nu īdzeivuotuojim izmontuos teleponintervejis.

Leivuonu inženertehnologeju i inovaceju centra Leivuonu nūvoda dūmis Lauku atteisteibys daļa reikoj seminaru lauksaimnīkim. Seminarā paradzāts izskateit dorba kuorteibys vaicuojumus par plateibu moksuojumim 2007.godam, ganeibu īreikuošona i kūpšona, kai ari citys atktualitatis lauksaimnīceibā.

Jaunbyuviejamajā Ludzys sporta hallē nūlamts īkluot sertificātu kūka greidu, kab cytulaik ari Ludzā varātum nūtikt starptautiska mārūga sporta sacenseibys. Dūmis izpylddirektors Juoņs Cirmans pastuosteja, ka Ludzys sporta hallis celtnīceiba nūris piec īdūmuotuo grafika. Itugod hallei juobyun gotovai.

Daugavpiļs rajona Laucesis pogostā nu nalegala naftys voda pīslāguma nūplyudusī dizeļdegvīla ir lokalizāta i vidis pīsuorņuojuma draudi napastuov. Avarejis vītu uzrauga dežuranti, kas savuoc pīsuorņuojuma puorpalykumu, bet tuo lelums vaira nav lels, kab radeitu draudus videi.

Nu šudiņdīnys da 10.majam Ludzā teik izsludynuots Spūdreibys mieness. Dūme aicynoj vysus īdzeivuotuojus sakūpt sovus īpašumus i tim pīdarūšū teritoreju. SIA “Ludzys apsaimnīkuotuojs” taipoš kai īprīškejūs godūs iz vīnu ci divejom dīnom var pīsaceit musuru konteineri.

Pīkdiņ Kruoslovys kulturys nomā nūtiks Kruoslovys rajona dramatiskūs kolektīvu saīts “Bolts čapāslys ver odotā dīgu”.
Ar īstudiejumim saītā uzastuos Grāveru, Andzeļu, Varnaviču, Indrys, Skaistys, Dagdys, Konstantinovys, Svareņu i Kruoslovys tautys i kulturys nomu dramatiskī kolektivi.

Šudiņ Borisa Bierzeņa dorbu izstuodis nu Latvejis Nacionaluo muokslys muzeja kruojumim atkluošonu Daugavpilī suoknās Muokslys dīnu pasuokumi.