Otkon problemys iz rūbežys
Ludzys rajonā šudiņ sasauks uorkuortys situaceju komiseju, kab lamtum par nasakavejūšu pasuokumu veikšonu krīzis situacejā saisteibā ar cīš garajom kravys transportleidzekļu ryndom pi Krīvejis rūbežys, Latgolys radeju informej Ludzys rajona padūmē.Iz uorkuortys situaceju komisejis sēdi ir uzaicynuoti visi dīnesti, kas īsaisteiti kab varātu paleidzēt rysynuot vaicuojumus par krīzis nūviersšonu – policejis, ceļu dīnestu, pasažiru puorvoduotuoji, rūbežsardzis, muitys i cytu struktūrvīneibu puorstuovi.
Valsts Rūbežsardze varātum atjaunuot kravys automašynu ryndu kontroli pi Latvejis-Krīvejis rūbežys, ja tiks dūts attīceigs aizdevums i pīškierti vajadzeigī leidzekli, tai informeja Vaļsts Rūbežsardzis Presis i sabīdriskūs attīceibu dīnesta prīkšnīce Dace Ūdre. Jei nūruodeja, ka ryndu kontrole vaļsts īkšzemē nav rūbežsardzis kompetencē. Rūbežsardzei ir pīnuokums uzturiet kuorteibu iz rūbežys i tuos tyvumā, taču rynda itamā šaļtī stīpnās jau da Riezeknei.
Augstuokuo tīsa vakar atcēle īprīškejuos instancis tīsys lāmumu, kurā kai drūšeibys leidzeklis vieliešonu dokumentu vyltuošonā apsyudzātajai verai Litviņecai beja pīmāruots apcītynuojums. Jau ziņuots, ka Latgolys apgoboltīsa 15.martā Litviņecai kai drūšeibys leidzekli pīmārova apcītynuojumu, jū apsyudzātuo naīsaroda iz tīsys sēdi.
Šudiņ pīcūs Preiļu nūvoda kulturys centrā nūtiks sanuoksme par dzeivojamū sātu energoaudita rezultatim i turpmuokajom aktivitatem daudzdzeivūkļu sātuos, kuramuos itūgod i īprīškejūs godūs ir veikts sātu energoaudits.
Vosorys periodā Leivuonu nūvoda dūme nūlāmuse maineit dorba laiku – dažuos dīnuos tū pagarynojūt, dažuos saeisynojūt, informieja dūmis sabīdriskūs attīceibu specialiste Ginta Kraukle.
Da septembram, pyrmudiņuos i caturtdiņuos pošvaļdeiba īdzeivuotuojus pījems ilguok – da vokora sešu, bet pīktdiņuos – treju piecpušdinē. Vysi puorejī dorba laiki i pušdiņu puortraukums paleik kai da šam. Itaida kuorteiba pošvaldeibā ir jau vairuokus godus vosorys sezonā.
Riezeknē aukstuo laika i iudeņsapguodis avarejis dieļ kavietuos vuiceibu stuņdis četrom školom byus juoatstruodoj vuiceibu goda pagarynuojuma laikā, tai pastuosteja Riezeknis piļsātys Izgleiteibys puorvaldis vadeituojs Arnolds Drelings. Vuiceibu gods tiks pagarinuots par vīnu dīnu, leidz ar tū 1.juņs vēļ byus vuiceibu dīna Rēzeknes gimnazejā i 1., 2., 4. vydsškolā.
Jākubpilī tymā nedeļā vairuokuos vītuos nūvītuos Leldiņu rūtuojumus. Šūgod kai svātku dizaina objekti ir izgotovuotys kruosainys, stilizātys pučis. Leldiņu rūtuojumi pošvaļdeibai izmoksuos apmāram 500 latu.
Nu šudiņdīnys da 12. apreļam Rēzeknis dūmis sociāluos apryupis
puorvaļde reikuos Leldīņu labdareibys akceju, kurys laikā moztureigī riezeknīši varēs sajimt siltys pušdīnis – zupys
škeivi i maizi.
