Latvejis zeme dag

Turpinojūtīs syltajam i saulainajam laikam, Latvejis īdzeivuotuoji vys vēļ aktivi dadzynoj pārnū zuoli, koč arī aizvadeitajā dīnnaktī itaidu guņsgrāku skaits ir nadaudz sasamozynovs. Aizvadeitajā dīnnaktī Latvejā ir registrāti 84 pārnuos zuolis guņsgrāki. Kūpumā itūgod Latvejā registrāti jau 676 kyulys guņsgrāki.

Šudiņ Daugavpiļs Raiņa sastuos vydsškolys muzeja klasē suoksīs divu dīnu vuiceibu seminars “Jaunīšu īsaisteišona kulturys vierteibu apgiušonā i radeišonā ar modernū tehnologeju paleidzeibu”. Seminarā kai naatjemama kulturys sastuovdaļa tiks apskateita animaceja, izskaidruota animacejis filmu tehnologiskuo daudzveideiba, kai ari izskateitys animacejis lītuojuma īspiejis kulturys pasuokumu režijā.

Šudiņ vokorā Daugavpiļs Latvīšu kulturys centrā nūtiks franču melodeju vokors, kuramā uzastuos popularuo estradis dzīduotuoja Marija Naumova i Daugavpiļs akordeonistu orkestrs Valērija Hodukina vadeibā. Franču melodeju vokors Daugavpilī teik reikuots festivala “Francejis pavosars Latvejā 2007” ītvorūs.

Šudiņ Rēzeknis augstškolā Atbreivuošonys alejā 115 aktu zalā nūtiks LINGUA projekta prezentaceja. Projekta materials – gruomota, projekta materials CD formatā i sātys lopa paradzāts jaunīšim i pīaugušajim ar prīkšzynuošonom angļu i vuocu volūdā. Kai ari nu šudines da 2. apreļam Rēzeknis Augstškolā gasteis Kaunis Vitauta Dižuo universiteta Letonikys centra vadeituojs, zynuotņu doktors Alvīds Butkus.

Reit pyrmuo apreļa jūku dīnys īskanī Rēzeknes centralajā bibliotekā teik organizāta izstuode “caur jūkim par nūpītnū”.