Marks Rotko byus Daugavpilī

Iz pasauļa pazeistamuo muokslinīka Marka Rotko bārni aplīcynuojuš gataveibu nūdūt Daugavpilī tūpūšajam muokslys centram vairuokus muokslinīka originaldorbus. Rotko muokslys centra izveidis projekts paradz Daugavpiļs cītūksnī Arsenala ākā izveiduot daudzfunkcionalu, starptautisku muokslys i izgleiteibys centru. Muokslys centrā paradzāts izveiduot Rotko ustobu, kuramā ari īdūmuots izlikt muokslinīka originaldorbus

Vacuokū klašu školānim, kuri izavielējuš sovu nuokūtni saisteit ar mediķa dorbu, šudiņ Rēzeknis slimineicā byus atvārtūs durovu dīna, pastuosteja Rēzeknis slimineicys golvonais uorsts Jezups Korsaks. Iz tikšonūs slimneicā tiks gaideiti gon Rēzeknis piļsātys, gon rajona školu školāni, kuri grybātu struoduot na tikai slimineicā, bet arī cytuos veseleibys apryupes nūzarēs, tūstorp laboratorejuos. Pl.14:00 Rēzeknis slimineicys konferenču zalā školānim paradzāta tikšonuos ar Reigys Stradeņa universitatis rektoru profesoru Jāni Vētru.

Vakar vaļdeiba atbaļsteja 300 tyukstušys latu pīšķieršonu plyudu radeitū zaudiejumu nūviersšonai Jiekabpiļs i Aizkrauklis rajonā.
Juosoka, ka Regionaluos atteisteibas i pošvaļdeibu lītu ministreja plyudu radeitū zaudiejumu nūviersšonai praseja 350 tyukstušys latu.

Itūnedeļ Ludzys dūmis prīkšsādātuoja Valentina Lazovska gastej Ukrainys piļsātā Truskavecā, kur oficialuos vizitis laikā storp obom piļsātom tiks paraksteits sadarbeibys leigums, tai pastuosteja Ludzys piļsātys dūmis presis sekretare Inga Tabūne. Sadarbeibys leigumu paradzāts nūsliegt piļsātu kūpeigūs interešu jūmuos: kuļturys, ekonomikys, socialajā i izgleiteibys jūmā.

Jiekabpils 2007.goda budžetā Kena parka rekonstrukcejis projekta izstruodei parādzātys 11 tyukstušys i 800 latu.
Kena parka atteisteibys vizeja paradz, ka mynātuo pilsātnīku atpyutys vīta nūsaceiti byutu sadaloma vairuokuos zonuos. Parkā paradzāta vīta gon bārnu spieļu laukumam, gon atpyutai klusumā ar skotu iz muorku, kurymā planuots īreikuot stryukloku.

Aptaujā par “Ludzys – 830” jubilejis pasuokumim nūskaidrovās, ka īdzeivuotuoji vysvaira grybātu apmekliet lelu nūslāguma koncertu. Aptaujā pīsadaleja 145 respondenti. Ludzys piļsātys 830.godadīnys svineibys byus nu 3.da 5.augustam. Tūs laikā paradzātys vysaidys aktivitatis – gon bārnim, gon jaunīšim, gon pīaugušajim.

Ludzys Tautys noma kūrs “Austrumstīga” vakar devēs koncertturnejā iz Vuocejis sadraudzeibys piļsātu Bodenteihu. Ideja par taidu braucīni roduos Zīmyssvātkūs, kod kūristi nūlieme ar sagotovuotū repertuaru apcīmuot sadraudzeibys partnerus Vuocejā.