Gruomotu svātki Ruguojūs

Bolvu rajona Ruguojūs šudiņ gruomotu svātki, kas suoksīs ar gruomotu komercizstuodi, piečuok byus “Latvejis Avīzis” vadeituo diskuseja “Kulturys dviesele: dzeiva ci myruse”, daleibu jam ari Kulturys ministre Helēna Demakova, vāluok tikšonuos ar Lītovys viestnīku Latvejā Antanu Vinkus, kai ari tikšonuos ar rakstnīku-dramaturgu Paulu Putneņu, dzejneicu Annu Rancāni i aktrisi, rakstneicu Mudīti Šneideri.

Baltejis futbola kluba turnira organizatori vakar nu sacenseibom izslēdze Latvejys vierslīgys klubu Daugavpiļs “Dinaburg”.
“Dinaburg” futbolisti trešdiņ gostūs ar 0:2 zaudieja Igaunejis komandai Narvas “Trans”, obejus vuortus īlaižūt spēlis beiguos. Piec spēlis veiruokūs Igaunejys masu medejūs pasaruodie informaceja, ka spēlis iznuokums nav bejs objektivs i, īspiejams, mačs bejs “sarunuots”.

Latglolys apgoboltīsa leidz 13. apreļam atlyka kriminallītu par 9.Saeimys vieliešonu biļetenu vyltuošonu Bolvu rajona Kubulu pogostā, kuramā vīns nu apsyudzātajim ir ari bejušais pogosta prīšksādātuojs Juris Boldāns. Iz tīsys sēdi vakar beja īsaroduš pīci nu sešim apsyudzātajim, līta atlykta ari piec apsyudzātūs, Jura Boldāna i juo dāla Igora Boldāna, lyuguma, jū iz tīsys sēdi navariejuse īsarast jūs advokate Valentina Oļhova.

Vakar veseleibys ministrys Vinets Veldre dorba vizitē Rēzeknē aicynuoja piļsātys īdzeivuotuojus i rajona pošvaļdeibys nūsaceit veseleibys apryupi par prioritati i izstruoduot “mozū māsterplanu” ituos nūzaris atteisteišonai sovā regionā. Kai sacie Veldre, cīši daudz kas ir pošvaļdeibys rūkuos, navajag vysu gaideit tikai nu vaļsts. Šudiņ ministrs gasteis Daugavpilī.

Vakar tīslītu ministrs Gaidis Bērziņš apmeklieja Jākubpiļa cītumu, kur atkluoja cītuma atkluotuo tipa nūdaļu, kuramā byus īspiejams izvītuot leidz 50 īslūdzeitajom personom. Jākubpiļa cītuma prīkšnīks Sergejs Logutovs informieja, ka leidz ar tū Jākubpiļa cītumā, kurais ir slāgta tipa cītums, izveiduotys ari deleji slāgtuo i slāgtuo tipa nūdalis.

Rēzeknis pošvaļdeibys delegaceja īceriejuse apmekleit Jōhve pošvaļdeibu Igaunejā, lai īsapazeitu, ar igauņu pīredzi kulturizgleiteibys objektu izveidē i apsaimnīkuošonā, tai Latgolys radeju iformieja Rēzeknis piļsātys dūmis sabīdriskūs attīceibu nūdalis vadeituoja Diāna Zirniņa.