Radioaktivajim atkrytumim – NĀ!
Šudiņ Daugavpilī pi rajona padūmis ākys nūtiks pret Ignalinys atomelektrostacejis (AES) izlītuotuos radioaktivuos degvīlys pagaidu globuotuvis izveidi vārsts pikets. Izlītuotuos radioaktivuos degvīlys pagaidu globuotuvi planuots izveiduot Ignalinys AES teritorejā natuoļ nu Latvejis rūbežys. Itūbreid Daugavpiļs rajona padūmis telpuos var īsapazeit ar ituos īceris publiskuos apsprīsšonys materialim.Vakar vokorā Rēzeknis Muokslys koledžys kūpmītnēs, Raiņa īlā 9.b, izacēle guņsgrāks. Iz kuruo dziesšonu beja īsaroduš četrys Vaļsts guņsdzieseibys i gluobšonys dīnesta brigadis. Guņsgrāka īmaslu vēļ nūskaidroj gon Rēzeknis policejā, gon Vaļsts guņsdzieseibys i gluobšonys dīnesta Rēzeknis nūdaļā.
Preiļūs, kur pyrma nedelis beja suocīs cīš lels gripys epidemejis pīaugums, ari paguojušā nedeļā saslimsteiba turpynuoja pīaugt. Paguojušajā nedeļā Preiļu rajonā iz 100 000 īdzeivuotuojim registrāti 2216 gipys saslimšonys gadejumi, vēļ pyrma dedelis saslymušū skaits beja 1948 iz 100 000. Bet Rēzeknē i Ludzā saslimsteiba ar gripu sasamazynuojuse.
Vakar Rēzeknis Specialuos ekonomiskuos zonys akcionaru sapuļcē apstyprynuotū pārnuo goda peļņu – 1049,58 latus – nūlamts nūvirzeit 2005. goda zaudiejumu segšonai. Sapuļcē akcionari nūlēme pīkrist akceju puordūšonai, leidz ar tū Rēzeknis pošvaļdeibys īpašumā kūpā byus 87,56% Rēzeknis Specialuos ekonomiskuos zonys akceju.
Šudiņ dorba vizitē Daugavpili apmeklies delegaceja nu Velsys. Daugavpilī gosti īplānuojuši īsapazeit ar piļsātu, tiktīs ar Daugavpiļs Izgleiteibys puorvaļdis vadeituoju Olgu Dukšinsku, apmkelēt Velsys priņča volūdu centru, tiktīs ar Daugavpiļs dūmis prīkšsādātuoju Ritu Strodi, apmeklēt Daugavpiļs 29. pyrmškolys izgleiteibys īstuodi, 3. vydsškolu i Krīvu kuļturys centru.
Šudiņ Rēzeknis 2. vydškolā divuos stuņdēs Piļsūneibys i migracejys lītu puorvaļde reikuos ikgadejū informativū pasuokumu par pasem. Pasuokums paradzāts školānu auditorejai. Specialisti snīgs informāceju par pasu sajimšonys kuorteibu nu 15 godu vacuma, par atjaunuošonu nūzaudiešonys gadejumā, kai ari par pasu sajimšonu, ja jaunīšam ir vairuok nakai 16 godu, bet pase vēļ nav sajimta.
