Dasmytais Nikodema Rancāna konkursa nūslāguma pasuokums ir nūtics Maltā
Dasmytais Nikodema Rancāna konkursa nūslāguma pasuokums nūtyka 21. septembrī Maltys vydsškolā. Latgalīšu kulturys bīdreiba padeve 7 pokovsaktys, Latgolys Etnografiskuo viestnīceiba caturtū reizi, bet Latvejis Izgleiteibys i zynuotnīku arūdbīdreiba trešū reizi padeve sovys eipašuos bolvys.
Itūgod konkursam beja dasaceiti 17 školuotuoji nu Rēzeknis, Kruoslovys, Leivuona, Preiļu nūvoda i Rēzeknis vaļstspiļsātys. Leivuona nūvoda školuotuoji beja konkursā pyrmū reizi i sajēme divys sudroba pokovsaktys, obys par īguļdejumu un sasnāgumim latgalīšu volūdys, kulturviesturis un nūvoda vuiceibys īvīsšonā un īdzeivynuošonā školā: Anna Kārkle, Leivuonu 1. vydsškola, folklorys kūpys “Ceiruleits” vadeituoja, i Rasma Svikle-Popova, školuotuoja Rūžupis i Jersikys školuos i dzejneica.
Juoatzeist, ka konkurss sajuta ituos vosorys Dzīšmu svātku atbluozmi: vaira beja nomināti muzykys školuotuoji, kuru sasnāgumi īprīškejā godā pateišom beja jiutami. Nominacejā “Par īguļdejumu un sasnāgumim latgalīšu volūdys, kulturviesturis un nūvoda vuiceibys īvīsšonā un īdzeivynuošonā školā” tyka gūdynuoti: Māris Susejs, Kruoslovys Muzykys i muokslys škola, Mārtiņš Dzindzuks, Viļānu Muzykys i muokslys škola; kai ari divys specialuos pokovsaktys taišni itamā nominacejā: Irēnai Rancānei, Nautrānu vydsškola, i Svetlanai Bilinskai, Rēzeknis suokumškola.
Nominacejā par radūšu i psihologiski atbolstūšu pīeju muoceibu ci studeju vidē itūgod beja mozuoks dasacejumu skaits, tok bolva tyka daškierta Juoņa Egleiša Preiļu Vaļsts gimnazejis latvīšu i latgalīšu volūdys školuotuojai ar 44 godu dorba stažu, metodiskuos apvīneibys vadeituojai, Humānuos školys ideju nesiejai Irēnai Baronei.
Latgolys Etnografiskuos viestnīceibys eipašuo bolva – lele pošdarynuotā etnografiskā tautystārpā – tyka daškierta Ārijai Bergmanei-Sprūdžai, foklorys kūpys “Jumalāni” vadeituojai, Rībeņu školys absolventei i ilggadejai školuotuojai.
Latvejis Izgleiteibys i zynuotnis darbinīku arūdbīdreibys (LIZDA) vadeituoja Inga Vanaga sovā uzrunā atguodynuoja, ka “Latgola ir vīneigais regions, kas školuotuoju gūdynuošynys pasuokumu ar speciali īdybynuotu bolvu, ir vīneigais regiona mārūga pasuokums. Tok ūtrū godu piec kuortys, var saceit, puormontojūt ideju nu Latgolys, Goda školuotuoja bolvys konkursu reikoj Latvejis Universitate.” LIZDA sovys bolvys padeve vairuokim školuotuojim: Anitai Klovānei (Rēzeknis Vaļsts pūļu gimnazeja), Irēnai Rancānei (Nautrānu vydsškola), Ilgai Macānei (Viļānu vydsškola), Ingai Skerškānei (Kruoslovys gimnazeja), Līgai Augstkalnei (Drycanu vydsškola), Annai Kārklei (Leivuona 1. vydsškola).
Nūslāguma pasuokuma daleibnīki pīsadaleja Školuotuoju gūdynuošonys stuņdē, prīcuodamīs leidza ar nominantim par eisajim video par školuotuojim, īsasaistūt Nikodema Rancāna dzeivis faktus izzunūšā aizdavumā, baudūt Rēzeknis nūvoda vokaluos studejis “Skonai” skaneigūs bolsus. Vīnkuorši sirsneigi pavadūt laiku sūpluok.
Itū reizi žūrejā beja Saeimys deputati, kas īvālāti nu Latgolys, Anna Rancāne, Alīna Gendele, Edmunds Teirumnieks, Juris Viļums i Valdis Maslovskis. Paļdis par finansialu informativu atbolstu kai individualajim zīduotuojim, tai Latgolys pošvaļdeibom: Rēzeknis, Ludzys, Bolvu, Preiļu, Leivuona, Kruoslovys nūvodim i Rēzeknis vaļstspiļsātai. Par informatīvu atbolstu portalam lakuga.lv, Latvejis radio Latgolys studejai i Vītejais Latgolys Avīzie.
Konkursu organizēja Latgalīšu kulturys bīdreiba sadarbeibā ar Latgolys Etnografiskū viestnīceibu, LIZDA i Maltys vydsškolu.
Eisūs video par školuotuojim varēs redzēt Latgolys.kongress Youtube.
Ilga Šuplinska,
Latgalīšu kulturys bīdreibys vadeituoja
