Boņuki par veikumu 2018. godā padūti
24. februarī Latgolys viestnīceibā GORS 11. reizi padeve Latgalīšu kulturys goda bolvu “Boņuks”, gūdynojūt 2018. gods latgaliskuos kulyutys aktivitatis, dorbus i sasnāgumus. Padūti 11 Boņuki i portala lakuga.lv skaiteituoju simpateja bolva.
Boņuku par myuža īguļdejumu sajēme muokslinīks Osvalds Zvejsalnieks. Sovukuort Latgalīšu kulturys ziņu portala lakuga.lv skaiteituoju simpateju bolvu – Žyka bolvu sajēme tautystārpu meistare Iveta Seimanova.
Latgalīšu kulturys goda bolvu “Boņuks 2018” sajēme:
Aija Īzāka, „Teksasys latgalīši” – albums „Dvieselis steigys”
Albumā „Dvieselis steigys” apkūpuotys labi zynomys latgalīšu i latvīšu melodejis jaunā akademiskā, instrumentalā skaniejumā, īkļauti ari pasauļa klasikys dorbi. Albumu īrakstejuse muzykaluo apvīneiba „Teksasys latgalīši” i vejūļneica, ASV dzeivojūšuo kuorsovīte Aija Īzāka. Albums ir duovona Latvejis symtgadē, tuo prezentacejis koncerti ar Aijis pīsadaleišonu nūtyka Rēzeknē, Daugovpilī i Reigā.
Anna Rancāne, kruojums „Prīca i klusiešona”
Annys Rancānis dzejis i eisprozys gruomota “Prīca i klusiešona” ir dzejneicys ostoitais kruojums, kas izguojs piec sešu godu ilgys pauzis. Vizuali kruojumu papyldynoj i boguotynoj Gundegys Rancānis gleznys. Gruomotā sūpluok teksti labi sadzeivoj gon latgalīšu, gon latvīšu rokstu volūda. Gruomotu izdavuse bīdreiba „Latgolys Studentu centrs”.
Annele Slišāne – projekts #100dečiLatvijai. Izstuodis i gruomota
Audieja Annele Slišāne tekstilmuokslys i literaturys projektu #100dečiLatvijai aizsuoce jau 2016. godā, tok 2018. godā tyka pabeigti vysi 100 deči i izdūta ari gruomota, kurā atkluots kotra deča topšonys stuosts. Nu dažaidu naparostu materialu veiduotī deči apceļuojuši vysu Latveju, atkluojūt autoris pasauļa redziejumu i latgalīšu volūdys šmukumu.
Apvīneiba „Latgalīšu Reps”
Hip hopa apvīneiba “Latgalīšu Reps” 2018. godā tyka na tikai par Latgolys, bet vysys Latvejis muzykys sensaceju. Apvīneiba nūfiļmiejuse treis videoklipus i izdavuse debejis albumu “Žārei gaļi”, izastuojuse koncertūs vysā Latvejā. Albuma tytuldzīsmei “Žārei gaļi” vītnē Youtube ir vaira nakai 700 000 skatejumu, kai ari Latvejis Radejis 5 Latvīšu muzykys top 20 dzīsme nūsaturēja gondreiž 4 mienešus.
Dokumentaluo kina „Latgalīši Pīterpilī”
Dokumentaluo kina „Latgalīši Pīterpilī” ir stuosts par latgalīšu Nacionalū atmūdu Krīvejis imperejis golvyspiļsātā Sanktpīterburgā aba Pīterpilī 19. g. s. beiguos i 20. g. s. suokumā. Kina taiseita popularzynuotniskuos žurnalistikys žanrā, kadri uzjimti gon Krīvejā, gon Latvejā. Kinu taisejuse bīdreiba „Kukuži”.
Dzejnīka i sabīdryskuo darbinīka Ontona Slišāna 70 godu svieteišona Zīmeļlatgolā. #OntonamSlišānam70
Vysa 2018. gods garumā ar dažaidom latgaliskom nūtikšonom tyka svieteits dzejnīka, folklorista i sabīdryskuo darbinīka Ontona Slišāna (1948–2010) 70 godu jubilejs. Svineibu ītvorūs izdūta gruomota „Vuss apleik maņ munā volūdā skaņ”, kurymā apkūpuoti bārnim veļteiti dzejūļi nu 15 Ontona Slišāna gruomotu.
Dzīšmu gruomota i CD bārnim „Zalta puče”
Dzīšmu gruomotā „Zalta puče” īkļautys latgalīšu dzīsmis ar natradicionalu notu pīrokstu. Izdavuma idejis autore ir klavesiniste i mama Ieva Saliete. Gruomotai kluot dalykts ari CD, kurā dzieržamuos dzīsmis īdzīduojuši folklorys kūpys „Vīteri” dalinīki. Gruomotys ilustracejis veiduojuse Ērika Māldere, izdavuse bīdreiba „Partitūra”.
Grupa „Bez PVN”
Grupai “Bez PVN” 2018. gods beja vīns nu aktivuokūs i radzamuokūs grupys pastuoviešonys laikā. “Bez PVN” dzīsmis tyka atskaņuotys dažaiduos Latvejis raidstacejuos, grupa gasteja televizejis i radejis raidejumūs. Video dzīsmei “Eņgeli sviļpoj” Youtube kanalā savuocs vaira na kai 120 000 skatejumu. Ar koncertim grupa klauseituojus prīcēja dažaiduos Latvejis vītuos.
Kārlis Kazāks. Raidejums „Dzirdi balsis ar Kārli Kazāku” par Ludzys izlūksni
Raidejums „Dzirdi balsis ar Kārli Kazāku” atkluoj latvīšu volūdys izlūkšņu skaistumu. Vīnā nu raidejumu tuo vadeituojs muzikis Kārlis Kazāks gasteja Ludzys pusē, kab īsaklauseitu tuos apleicīnis bolsūs. Īpazeistūt Ludzys izlūksni, Kārlis Kazāks kūpā ar hip hopa apvīneibu „Latgalīšu Reps” radeja dzīsmi „Bolta lopa”.
Koncepts „Nameiz”, Jānis Skutelis i „Benji Knewman”
Īsadvesmojūt nu kinys „Nameja gredzens”, šovā „Pusnakts šovs septiņos ar Jāni Skuteli” topa parodijvideo „Nameiz”, kas dabuoja plotu īviereibu interneta lītuotuoju vydā, sovaižuokā veidā popularizejūt latgalīšu volūdu. Piečuok, sasadorbojūt ar gruomotžurnala „Benji Knewman” dizaina preču lineju, puortopa T-kraklūs i džemperūs „Nameiz”, kurus kasdīnys volkuošonā izavielej daudzi interesenti, sovā veidā lepojūtīs i aplīcynojūt latgaliskū pīdereibu.
