Ar koncertu Kuorsovā byus golā grupys „Bez PVN” jubileja koncertu sereja

Piec četru 10 godu jubilejam veļteitūs koncertu izskaniešonys grupa „Bez PVN” 27. decembrī aicynoj iz nūslāguma koncertu i dzimšonys dīnys svieteišonu Kuorsovā.

2003. goda 27. decembrī Kuorsovā nūtyka latgalīšu grupys pyrmais koncerts, kam par gūdu novembrī i decembrī beja 10. jubilejam veļteitī koncerti Daugavpilī, Rēzeknē, Jelgovā i Reigā. Nūslāguma koncerts byus eistynuos dzimšonys dīnys svieteišona i simboliska atsagrīzšona „Bez PVN” pyrmajā sātys vītā – Kuorsovys kulturys nomā.

Piec Reigys koncerta kaida koncerta klauseituoja socialajā portalā Twitter.com raksteja: „Ituos nakts „Bez PVN” koncerts ČBK lyka maņ vēļreiz saprast, ka es teišom mīļoju Latgolu, latgalīšus i myusu volūdu!” Grupa „Bez PVN” ir latgaliskuo vuorda nesieji, vīni nu Latgolys modernuos muzykys aizsuociejim, pīruodejuši, ka muzyka latgaliski var byut ari myusdīneiga, nu taipat kai pyrma 10 godu palykuši izticeigi sauklim „Mez dzīžam taidā volūtā, kaidā dūmojam!”. Tik nūtykušajā Kuorsovys nūvoda jaunīšu Goda bolva grupa sajieme pateiceibu kai leluokī „Kuorsovys vuorda popularizātuoji 2013. godā”.

„Bez PVN” prīcojās par atsauceibu i ir pateiceiga par atbolstu jau nūtykušajūs koncertūs, deļtuo sovā dzimšonys dīnā vysys dīnys garumā tim, kurī vēļ nav paspiejuši, pīduovuos vareibu bez moksys dabuot grupys itymā godā izdūtū albumu „Reits”.

Gon jau aizguojušūs koncertūs beja, gon 27. decembra jubileja koncertā klauseituojim byus vareiba dzierdēt na viņ dzīsmis nu īprīškejim albumim „Pyrms vuorda” i „Reits”, nu ari skaņdorbus nu 2014. godā izdūšonai paradzātuo grupys trešuo albuma. Jaunys dzīsmis, albums, koncerti i aktiva rūseiba – tī ir „Bez PVN” plani gaidamajam godam.

Koncertus informativi atbolsta: portali draugiem.lv i lakuga.lv, “Vietējā Latgales Avīze”, “Ludzas Zeme”, Latgolys radeja i žurnals “A12”.

Vaira par grupu bezpvn.lv
„Bez PVN” socialajūs teiklūs:
draugiem.lv/bezpvn
twitter.com/BezPVN
facebook.com/grupa.BezPVN

Dzīsmis klausomys ite: soundcloud.com/bezpvn

Informacejai, intervejom, stuostim:
Guntis Rasims, „Latgolys Producentu Grupa”
bezpvn@inbox.lv, 29492864