Eiropys pādi latgalīšūs: školuotuoja i izgleiteibys eksperte Evelina Baluode
Nu ituo gods maja zam Latgolys planavuošonys regiona spuorna struodoj “Europe Direct Dienvidlatgale” centrs, kas sovu darbeibu aizsuoce ar vierīneigu “Vidis dīnu Daugovpilī” i itūšaļt eistynuojs viertini dažaidu nūtikšonu izgleiteibys, uzjiemiejdarbeibys i jaunuotnis sferuos. Niu centrs, sasadorbojūt ar “Vietējā Latgales Avīze” i portalim grani.lv i latgalīšu kulturys ziņu portals lakuga.lv, kab padareitu plotuokys Latgolys īdzeivuotuoju zynuošonys par Eiropys Savīneibu (ES) i īpazeistynuotu ar dažaidu sferu puorstuovim Latgolā, skaiteituojim pīduovoj sarunu cyklu “Eiropys pādi latgalīšūs”.
Sarunu cykla stuostu turpynuojumā īpasazeišona ar daugovpilīti Evelinu Baluodi (Evelīnu Balodi). Jei ir Profesionaluos izgleiteibys kompetenču centra “Daugovpiļs Dizaina i muokslys vydsškola “Saulis škola”” školuotuoja, Daugovpiļs Izgleiteibys puorvaļdis eksperte projektu vaicuojumūs i daudzu ES programys “Erasmus+” atbaļsteitūs projektu vadeituoja, kurei ituos programys projektūs rauga īsaisteit ari jaunīšus.
“Pyrma 15 godu pīsaceju pyrmū ES, tūlaik vēļ “Comenius” projektu, jo, byudama muokslys viesturis školuotuoja, turu, ka školuotuojam pošam ir juoradz tys, par kū roksta muokslys viesturis gruomotuos. Tūlaik tys beja školuotuoju izgleitojūšais braucīņs, kursi Grekejā. Maņ tei beja pyrmuo vierteiguo pīredze, kai raksteit i eistynuot projektu. Nu tuo laika kas gods īsnādzu vairuokus izgleitojūšus projektus, pīkreitu sadarbeibom, i gondreiž vysi i sajem atbolstu. Tī leluokā tīsā ir jaunīšu projekti. Projekti izgleitoj, pamej dūmuošonu i attīksmi pret daudzom svareiguom dzeivis sferom. Atsagrīžūt sātā, jaunīši radz cytu Latveju, jī soka – cik Latveja ir loba i skaista. Nu školuotuojs, atbrauc ar jaunom zynuošonom i pīredzi, sovā vuiceibu prīškmatā teik vēļ zynūšuoks i vaira pīredziejs. Ni školānim, ni ari školuotuojim nav taidys naudys, kab jī dažys dīnys voi pat nedeļu varātu itai izagleituot kaidā nu ES daleibvaļstu,” stuosta Evelina.
Īsasaistūt projektūs, jaunīši kai īpazeist školys cytuos vaļstīs, tai ari uzloboj angļu volūdys zynuošonys i īsavuica ari jaunys volūdys, sovā stuostā turpynoj Evelina. Taipat projektu dalinīki īpasazeist ar jaunim draugim. Itūgod pi juos pošys gasteja Marianna nu Ungarejis, ar kurū Evelina īpasazyna taišni tymā pyrmajā projektā braucīnī iz Grekeju.
Evelina izsver: “Projekti padora plotuoku cylvāka redzislūku, mudynoj izagleituot i ceļuot, īpazeit jaunys vaļsts, kontinentus, tautys, volūdys. Pasasokūt projektim, poša asu īsavuicejuse īraudzeit kūpejū ainu ari izgleiteibā. Saīt, daudzom vaļstim ir daudzi kūpeiguo, bet taišni tikpat daudzi i ari atškireiguo, i tū ir vārts puorjim i īvīst ari sovā dorbā. Maņ cīši pateik itaļu kolegu pīredze, ka vysi bārni – vasalī, ar kusteibu i redzis traucejumim, ar autismu i cytom saslimšonom – īt iz vīnu školu. Deļtuo Italejā nav specialūs školu.”
Evelina skaidroj, ka “Erasmus+” programa atbolsta tuoļuokizgleiteibys, sadarbeibys (školu, navaļstiskūs organizaceju, pošvaļdeibu īstuožu i tt.) i praksis projektus (par pīmāru, tūpūšī vokalisti vuicuos fado dzīduošonu Portugalē). Itūšaļt ES viereibys fokusā ir psihologiskuos i emocionaluos veseleibys, diskriminacejis i cytys aktualitatis.
Vysu jaunuokū informaceju par “Europe Direct Dienvidlatgale” darbeibu i pakolpuojumim var izzynuot Facebook.com/EuropeDirectDienvidlatgale i sātyslopā lpr.gov.lv.
Rokstu sataveja: Egita Terēze Jonāne (Vietējā Latgales Avīze)
