Dīnnakts nūmetne pusaudžim „Sūpluok” styprynova nacionalū pīdereibu
Latgalīšu kulturys bīdreiba (LKB) ir pīsadalejuse daudzu kulturys pasuokumu reikuošonā. Itamā godā jau trešū reizi teik organizāta ari nūmetne „Sūpluok”, kurys atškireibys zeime šūreiz beja ukraiņu pusaudžu i školuotuojis pīsadaleišona. Nūmetnis dalinīki – latvīšu i ukraiņu pusaudži – izdzeivuoja latgaliskuos vierteibys, meklēja saskaris punktus ar ukraiņu kultūru, diskutēja par etniskajim stereotipim i radeja sadzeivis ainenis par jim, styprynuoja sovys latgalīšu volūdys prasmis i teritorialū i nacionalū pīdereibys apziņu.
Nūmetne nūtyka nu 17. da 24. juļa Riezeknis nūvoda Rogovkā. Nūmetnis nūdarbeibys nūdrūšynuoja literaturys zynotneica i sabīdryskuo darbineica Ilga Šuplinska, multimuokslineica i školuotuoja Evika Muizniece, Riezeknis Tautys teatra aktrise i školuotuoja Sandra Juste, etnomuzikologs i muzykants Ēriks Zeps, kulturys aktiviste Inga Vigule. Sūpluok ar dalinīkim struoduoja i puordūmuos par Ukrainys vaicuojumim, myužeigom vierteibom dalejouos pedagoge nu Ukrainys Oksana Fartušna i nūmetnis vadeituoja – Lolita Kivleniece-Kuzņecova.
Nūmetnē tyka gaideiti aktivi pusaudži, jū vydā arī 8 ukraiņu puorstouvi. Vysys dīnys tyka pīpiļdeitys ar radūšumu – izgleituojūši dorbojūtīs, pošim izdūmuot dzīsmi voi puorsoku, anekdotis voi CV formā pastuosteit par nūmetnē nūteikūšū avīzē, dazynuot sova uzvuorda izcelsmi i saprast, cik svareiga lūma ir volūdai. Atsapyšūt kuoju prīcys voi teatra nūdarbeibā, dazynuot vaira par latgalīšu vierteibom i symbolim, veiduot sovu imidžu, izsapynojūt nuokūtnis projektu idejis.
Nūmetnē pusaudži vaira runuojaa i dūmuoja par latgaliskū, tuo saikni ar nacionalū i pasauleigū, kur itamā šaļtī tik daudz emocionalu viestejumu, patīsu i vyltus ziņu par karu Ukrainā. Sevkurs nu nūmetnis dalinīkim atbolsta Ukrainys centiņus piec mīra i naatkareibys, saprūt, ka tuos ir aplīcynojamys vierteibys sevkurā valstī.
Seviški spylgtai tradicejis tyka izdzeivuotys danču vokorā i nūslāguma pasuokumā „Tradīceju trase. Putynu meiklis”. Tymā pusaudži sūpluok ar vacuokim piec geografiskajom koordinatem raudzeja atrast nūteiktus objektus Rogovkā i rysynuot dažaidys putynu meiklis, kai ari atguoduot žongliešonu, tautysdzīsmis dzīduošonu voi kaidu piramidu, īsaistūt vysu komandu. Naizpalyka sarunys pi guņskura, kuo ari prīca par ekskursiju iz Preiļu pusi, kur varēja dorbuotīs ar muolu, gasteit fotomuzejā pi Igora Pliča, dazynuot par Latgolys karūga i Feimaņu viesturi pi Māra Rumaka.
Vīnai vosorai gona daudz latgalisku īspaidu. Ir cereiba, ka tī tiks lykti lītā školys laikā i nuokūtnis sapynūs.
Nūmetni organizēja Latgalīšu kulturys bīdreiba, finansiāli atbaļsteja sadarbeibā ar Riezeknis nūvoda dūmi i Latgolys kulturys programa, projekts „Pusaudžu diennakts nometne “Sūpluok”” (līguma nr. LKP 2022/42)” i Rēzeknis nūvoda dūme.
Video materialu var skateitīs:
Lolita Kivleniece-Kuzņecova, nūmetnis vadeituoja
