Bolvu par myuža īguļdejumu latgalīšu kulturys atteisteibā sajims kordirigents Juoņs Gruduls
Latgalīšu kulturys goda bolvys “Boņuks 2021” padūšonys ceremonejā, kas nūtiks 5. martā Latgolys viestnīceibā GORS, par myuža īguļdejumu latgalīšu kulturys atteisteibā tiks gūdynuots kordirigents Juoņs Gruduls.
Juoņs Gruduls ir vīns nu Latgolys veiru koru kusteibys radzamuokūs puorstuovu, kordirigents, pedagogs. Dzims 1946. godā Modūnis rajona Stiernīnis pogostā, 1971. godā absolviejs Rēzeknis Muzykys vydsškolys kordirigentu nūdaļu i suocs pedagoga gaitys Rēzeknis 1. vydsškolā, tuos turpynojūt Juoņa Ivanova Rēzeknis muzykys koledžā. 1991. godā Daugovpiļs Pedagogiskajā institutā sajiems augstuokuos izgleiteibys diplomu muzykys specialitatē. Paraleli pedagoga dorbam ir bejs dirigents daudzim korim Latgolā, ar koru kolektivim apceļuojs daļu Eiropys, bejs viersdirigents Latgolys nūvoda školu jaunuotnis Dzīšmu svātkūs, Latgolys nūvoda Dzīšmu svātkūs, ari Latgolys nūvoda i Latvejis zānu koru VI saliduojumā.
Vīna nu spylgtuokajom šaļtim dirigenta karjerā ir Juoņa Grudula veiduotuo i 20 godus vadeituo veiru kora “Olūts” uzvara XXII Vyspuorejūs latvīšu dzīšmu svātku koru karūs, kas daudzim beja puorsteigums, atkluojums, pat sensaceja, tok dzīduotuojim i dirigentam – miļzeiga i labi padareita dorba svieteigs, peļneits auglis. Itymūs svātkūs kors sajēme bolvu ari par lobuokū Jāzepa Vītola kordzīsmis atskaņuojumu.
Nu 2000. goda Juoņs Gruduls ir atsagrīzs i dorbojās dzymtajā Stiernīnis pusē, voda Stiernīnis gareiguos muzykys kori “Reversium”, kotru godu ir Aglyunys Dīvmuotis dabasūs uzjimšonys svātku dirigents, Latgolys draudžu kūpkora dirigents pāvesta Franciska vizeitis laikā Aglyunā. Vys vēļ dirigents lobpruot dūd padūmu i īdrūsynuojumu jaunajai muziku paaudzei. Septeņdesmit pīktū dzeivis godu aizvadejs kotrys svātdīnis dīvkolpuojumūs, mieginuojumūs, saļmu dzīduojumūs, “Krystaceļa” i “Ryugtūs suopu” audio īrokstūs Stiernīnis bazneicā, aktivai sekuojs leidza vysim kulturys dzeivis procesim i vys vēļ turpynoj ryupētīs par dzeivis augstuokūs vierteibu saglobuošonu i vairuošonu. Reizē ar pacaltū dirigenta Grudula rūku, augšā ceļās latgalīši, apsazynojūt sovu pīdareibu Muorys zemei i Dīvam!
Latgalīšu kulturys goda bolva “Boņuks” pyrmū reizi tyka padūta 2009. godā, tok nu 2013. goda bolvu reikoj Latgolys viestnīceibys GORS komanda, sasadorbojūt ar bīdreibu “Partitūra”. “Boņuks 2021” nūtikšonu atbolsta Vaļsts kulturkapitala fonda Latgolys kulturys programa ar A/S “Latvijas valsts meži” i Latgolys regiona atteisteibys agenturys atbolstu, kai ari Rēzeknis piļsātys dūme, Daugovpiļs piļsātys dūme, Leivuona nūvoda pošvaļdeiba i Rēzeknis nūvoda pošvaļdeiba.
Da ituo Latgalīšu kulturys goda bolvā „Boņuks“ par īguļdejumu latgalīšu kulturys atteisteibā gūdynuoti gruomotizdeviejs Juoņs Elksnis, dzejnīks i literaturzynuotnīks Osvalds Kravalis, sabīdryskais darbinīks, Latgalīšu rakstnīceibys muzeja vadeituojs Pīters Luocs, dzejnīks, folklorists i sabīdryskais darbinīks Ontons Slišāns, radejis raidejuma „Latgolys vuords“ veiduotuojs Bronislavs Spridzāns, etnografiskuo ansambļa „Rikova“ ilggadejuo vadeituoja Janīna Mičule, Atašīnis etnografiskuo ansambļa „Vīraksne“ vadeituoja Valentīna Mičule, kordirigente Terēze Broka, žurnaliste, žurnala „Katōļu Dzeive“ redaktore Maruta Latkovska, katuoļu pravests, kulturviesturnīks i sabīdryskais darbinīks Alberts Budže, kordirigenti i pedagogi Antonina i Vitolds Milaševiči, školuotuojs, publicists i literats Alberts Spuogis, volūdneica Lideja Leikuma, muokslinīks Osvalds Zvejsalnieks, tieļnīks Indulis Folkmanis i keramiks Voldemārs Voguls.
