Jov ūtrū reizi svieties namaterialuo kulturas montuojuma svātkus “Gūdi”
4. decembrie Bolvu nūvoda Škilbānu pogosta Upītē jov ūtrū reizi tiks svietieti namaterialuo kulturas montuojuma svātki “Gūdi”. Atzeimejūt 3 godu jubileju Upītes kulturtelpas īkļaušonai Nacionalajā namaterialuo kulturas montuojuma sarokstā, tiks pasaceits paļdis ituos puses namaterialuos kulturas veicynuotuojim, atbaļsteituojim i leidza jutiejim. Svātkus reikoj Namaterialuos kulturas montuojuma centrs “Upīte”. Svātku koncertā pīsadaleis Dainis Skutelis, Rihards Krilovs, folkloras kūpa “Upīte”, grupa “Unknown Artist” i Jāzepa Vītola Latvijas Muzykas Akademejis studentu projekts Ethno+Jazz, bet koncertu vadeis dzeijneice i muokslineice Evika Muizniece, informej Namaterialuo kulturas montuojuma centra “Upīte” direktors Andris Slišāns.Upītes kulturtelpa, kas pyrms treis godim tyka īkļauta Nacionalajā namaterialuo kulturas montuojuma sarokstā, ir daļa nu viesturyskuo Abrenes apriņča i unikala ar saglobuotū i dzeivū Zīmeļlatgolas latvīšu (latgalīšu) kulturas montuojumu, tradicejom i volūdu. Upītes kulturtelpas suokums – 20. gs. 30. godi, bet 40.–50. godūs, izaveidojūt kolhozim, tyka radeits pamats Upītes cīmam, kas atsarūn centrā vacajai kulturtelpai, kū veidoj lelī cīmi. Upīte ir pazeistoma gon ar Zīmeļlatgolai rakstureigū folkloras montuojuma globuošonu i aktivu populariziešonu, tei sovulai beja dzejnīka i nūvodpietnīka Ontona Slišāna darbeibas vīta, kai ari myusu dīnuos Upīte ir vīna nu aktivuokūs latgaliskūs nūtikšonu vītu Latvejā, reikojūt kai vacuokū latgalīšu dzejas i muzykas festivalu “Upītes Uobeļduorzs”, starptautiskū folkloras festivalu “Lipa kust” i cytas nūtikšonas.
Kab gūdynuotu ituos kulturtelpas kūpiejus, veicynuotuojus, atbaļsteituojus i leidza jutiejus, jov ūtrū reizi Bolvu nūvoda Upītē teik reikuoti lelī svātki “Gūdi”, kurūs vēļ nabejušā veidā sasaveis tradicionalais ar myusdīneigū gon mutvuordu i amatnīceibas, gon kulinarajā Upītes kulturtelpas montuojumā. Svātku koncertā 4. decembrie 17.00 pīsadaleis grupas operdzīduotojs Dainis Skutelis, folkloras kūpa “Upīte”, grupa “Unknown Artist”, gitarys virtuozs Rihards Krilovs i Jāzepa Vītola Latvijas Muzykas akademejis studentu projekts Ethno+Jazz, bet koncertu vadeis dzeineice i muokslineice Evika Muizniece.
Svātkus atbolsta Valsts Kulturkapitala fonds.
