Jauna jūku gruomota “Kas bez iuzu — tys bez bādys” latgaliski
Latgalīši vysod bejuši pazeistami na viņ ar sovu sirsneibu, tok ari ar eipošu humora izjiutu. Tū apsazynojūt bīdreiba “Latgolysb Studentu centrs” vaira kai 2 godi struoduoja pi latgalīšu jūku gruomotys “Kas bez iuzu — tys bez bādys” izveidis i niule aicynoj iz prezentacejis pasuokumu, kas nūtiks 2. febralī 19.00 stuņdēs Rībeņu nūvoda Seiļukolna kulturys nomā.
“Kas bez iuzu — tys bez bādys” ir nalela, kuldys formata gruomota, kurā apkūpuota latgalīšu myusu dīnu mutvuordu folklora – izteicīni, gudreibys, jūki, anekdoti, tosti i loba vielejumi, kū sevkurs skaiteituojs vareis izmontuot kai špikeri svātkūs ci puorskaiteit kasdīnā. Latgaliskī teksti papyldynuoti ar fotokarteitem i ilustracejom.
Ideja par itaidu myusu dīnys folklorys apkūpuojumu roduos Dagnijai Dudarjonokai. Tīši juos vadeibā LgSC jaunīši suoka vuokt anekdotus, izteicīņus, tostus i loba vielejumus, izvaicojūt rodus, draugus i pazinis. Popularizejūt itū projektu jau nu 2017. goda tyka reikuotys aktivitatis, kab izrunuot Latgolys īdzeivuotuojus daleitīs sovuos zynuošonuos i smīkleiguos nūtikšonuos.
Sevkurs zyna, ka latgalīšu mozī jūceņi mejās ar lobu devu sarkasma. Tys atrūnams ari myusu tradicionalajā folklorā – apdzīduošonys dzīsmēs. Tok atsateista na viņ tehnoloģejis ci volūda, tok ari mutvuordu folklora. Par tū kasdīnā cieški teik lītuoti ari vysaidi aktuali izteicīni. Nazkod ļauds smējēs, ka vysta nav putyns, i buoba nav cylvāks, niule sika opels nav mašyne, buoba nav cylvāks. Nazkod sacēje – lobuok vāluok, kai nikod, niule soka – lobuok vāluok nakai viel vāluok!
Gruomotā “Kas bez iuzu — tys bez bādys” sevkurs, skaiteituojs vareis īpazeit myusu dīnu mutvuordu folkloru, atrast lobuokū tostu svātkim, ci smīkleiguokū atgadīni ci anekdotu, kab uzlobuotu nūskaņojumu sev i cytim. Gruomotys ir pīeejamys gruomatneicuos “Jānis Roze”, veikalā “Liesma” Rēzeknē, veikalā “O!Marta” Daugovpilī, kai ari internetveikala: taiseitslatgola.lv. Gruomotys izdūšonā finansialu atspaidu snāguse bīdreiba “LR”.
2.febralī Seiļukolna kulturys nomā sevkurs interesents aicynuots apmekleit nanormali nūpītnū i glaunū gruomotys prezentacejis pasuokumu “Kas bez iuzu — tys bez bādys”. Pasuokumā ar smīkleigom miniaturom izastuos dažaidi amatīrteatri nu tyvuokys i tuoluokys apleicīnis. Eipošu puorsteigumu gatavej ari poši LgSC jaunīši. Pasuokuma laikā byus vareiba ari tikt pi gruomotys.
Iz sazatikšonu Seiļukolnā!
