Gūdynuos lobuokūs Latgolys školuotuojus
Da 9.septembram teik gaideiti dasacejumi Nikodema Rancāna vuordā nūsauktuo konkursa ītvorā, kab jau pīktū godu piec kuortys tyktu padūtys bolvys lobuokajim Latgolys pedagogim.
Nominantus dasaceit var pīcuos kategorejuos: par latgalīšu volūdys, kulturviesturis i nūvodvuiceibys populariziešonu i īvīsšonu vuiceibu voi studeju vidē; par inovativu metodikys lītuojumu apvuiceibys procesā; par myusdīneigu i radūšu pīeju školānu dorba tykuma audzynuošonai un omotu apvuiceibai; par veiksmeigu debeju (pedagogim na vairuok kai ar 3 godu darba stažu) i par latvyskuos i latgaliskuos kulturvidis veiduošonu pyrmsškolys izgleiteibys īstuodēs. Pīktuo nominaceja ir guojuse kluot piec pošu pedagogu lyuguma. Papyldu var tikt dašķiertys ari cytys bolvys piec izviertiešonys žurejis lāmuma.
Nikodema Rancāna konkursa bolvu ir īdybynuojuse Latgalīšu kulturys bīdreiba (LKB) i konkursa reikuošonu realizej sadarbeibā ar Rēzeknis Tehnologiju akademeju (RTA) i vysom Latgolys pašvaļdeibom. Itūgod Latgolys planavuošonys regiona Atteisteibys padūme (LPRAP) ir īzasaistejuse konkursa sareikuošonā – vysleluokais paļdis par tū! Konkursa mierkis – ir styprynuot pedagoga profesejis prestižu i atpazeistameibu sabīdreibā, gūdynojūt izcylu veikumu pedagogiskajā darbeibā, latviskuos i latgaliskuos kulturys tradiceju īaudzynuošonu jaunajā paaudzē.
Ar konkursa nūlykumu i tam dalyktū dasacejuma anketu var īsapazeit LKB škārsteikla lopā latgalisubidreiba.mozello.lv, kai ari Latgolys planavuošonys regiona sātys vītnē www.lpr.gov.lv i Latgalīšu kulturys portalā LaKuGa.LV
Izcylais katuoļu goreidznīks i pedagogs Nikodems Rancāns (1870–1933) ir Latgolys pyrmuos atmūdys darbinīks ar īspaideigu davumu Latgolys kuļturā i izgleiteibā. Nikodema Rancāna bolvys pretendentus vairuokuos nominacejuos, pīmynūt juo daudzveideigū darbeibu, izviertēs LPRAP apstyprynuota žureja, kurys sastuovā aicynuoti Izgleiteibys i zynuotnis ministrejis, Latgolys pašvaļdeibu puorstuovi, izgleiteibys i kulturys darbinīki. Bolvys padūšonys svineiguo ceremoneja kotru godu teik reikuota kaidā nu Latgolys pašvaļdeibom. Jau īpriešk ir izlamts, ka itūgod nūslāguma pasuokums tiks reikuots 22.septembrī Rēzeknis Tehnologiju akademejis telpuos. Īprīškejūs godūs bolvys padūšonys ceremoneja ir nūtykuse kai Rēzeknē, tai Ludzā, Viļānūs i Preiļūs.
Esit atsauceigi i nataupit lobūs vuordus školuotuojim, kas kotru gadu styprynoj Latvejis sabīdreibu i guodoj par jaunuos paaudzis izgleituošonu! Apsaverit nūlykumu, aizpildit dasacejumu i nūsyutit tū da 9.septembram!
Seikuoka informaceja pa tuolruni 26393531 ci rokstūt iz epostu latgalisubidreiba@gmail.com
