Raidejums „Kolnasāta”ūtrū godu piec kuortys sajiems Latgalīšu kulturys goda bolvu „Boņuks”
„Latvejis Radejis” raidejums „Kolnasāta” īgivs Latgalīšu kulturys goda bolvu „Boņuks 2013” nominacejā „Par latgalīšu volūdys populariziešonu”. Bolvys izcyluokajim aizvadeituo goda latgalīšu kulturys dzeivis nūtykumim i personeibom 19 nominacejuos tyka padūtys 23. februara vokorā Latgolys viestnīceibā GORS Rēzeknē. Bolva itūgod padūta jau sastū godu, raidejums „Kolnasāta” jū īgivs ūtrū reizi.
Raidejuma „Kolnasāta” mierkis ir īpazeistynuot sabīdreibu ar Latgolys ekonomiskajom, socialajom i kulturys aktivitatem, veicynojūt Latgolys kulturvidis, vierteibu i tradiceju sasaglobuošonu i atteisteibu. Raidejums skaņ latgaliski, i juo adresats ir sevkurs, kuru interesej latgalīšu kultura, regiona sovpateiba i Latvejis kulturtelpys dažuodeiba.
„Kolnasāta” radejis klauseituojus informej par aktualim kulturys i izgleiteibys nūtykumim i sociali ekonomiskim vaicuojumim Latgolā, stuosta par inovativom uzjiemejdarbeibys idejom i uzjiemieju veiksmis stuostim, īpazeistynoj ar dažaidu paaudžu i profeseju cylvāku dzeivisstuostim, akcentejūt nūvoda sovpateibu, viesturi i šudiņdīnys dzeivi. Raidejums rauga paruodeit procesu, kas veidoj nūzeimeigu Latvejis nacionaluos kulturys daļu.
Kotru nedeļu studejā gastej vīna voi vairuokys personeibys, kas īpazeistynoj ar nūzeimeigim Latgolys kulturys i sabīdryskuos dzeivis nūtykumim i aktualitatem, pīduovoj sovu redzīni i personeigū stuostu. Raidejumā izskaņ aizvadeituos nedelis svareiguokūs Latgolys kulturys i socialuos dzeivis nūtykumu apskots i jaunuos nedelis nūtykumu pīsacejums. Klauseituojim teik pīduovuotys reportažys nu Latgolys, kū gatavej korespondente Guna Zvīdre, i latgalīšu volūdys vuordineica audio formatā – jū iz maiņom gatavej Valentins Lukaševičs i Ilze Sperga.
Raidejums „Kolnasāta” skaņ „Latvejis Radejis” 1. programmā kotru sastdīnis vokoru 18:15 st. ar atkuortojumu svātdīnuos nu reita 5:03 st. „Kolnasātys” vadeituojs ir Aigars Runčis, producente Daira Kokoreviča, redaktore Ilze Sperga.Tyvuokajuos sastdīnēs „Kolnasātā” gasteis latgalīšu folkroka/metala grupa „Green Novice”, kas niu gatavejās izlaist sovu pyrmū albumu, i dzīduotuoja Laura Bicāne.
Atejūt jaunajai turisma sezonai, gaidoma saruna par Latgolys turisma pīduovojumu i vītejū kulinarū montojumu kai byutisku turisma produktu. Sarunā pīsadaleis Latgolys kulinaruo montuojuma centra puorstuovis Inta Lipšāne, Kruoslovys nūvoda turisma Informacejis centra specialiste, i Inese Survilo, lauku sātys „Upenīte” saimineica.
Raidejums vysod gaida informaceju par kulturys i sabīdryskuos dzeivis nūtykumim Latgolā. Rokstit mums par aktualim nūtykumim, par rodūšim i darbeigim cylvākim, par lobom idejom, projektim i dorbim!
“Kolnasāta” – tei ir īspieja Latvejai izzynuot par radeituojim i dareituojim Latgolā. Par Latgolys gaišajim cylvākim, kas var īdvasmuot na tikai sābrus, bet ļauds tyvu i tuoli.
Vaira informacejis:
Ilze Sperga,
raidejuma „Kolnasāta” redaktore
E-posts: latgale@latvijasradio.lv
Tviterī: @Kolnasata
