Nāc pīsadaleit festivalā „Muzykys Skrytuļs‟!
![](https://lpr.gov.lv/wp-content/uploads/2013/latgaliski/7862-300x254.jpg)
Daugovpiļs nūvoda Leiksnā ituo gods 4.,5. i 6. julī jau pīktū reizi nūtiks leluokais jaunuos latgalīšu muzykys festivals „Muzykys Skrytuļs‟, puļcejūt muzykantus, kuri vysaidūs žanrūs roksta ci izpylda dzīsmes latgaliski.
Festivala laikā nūtiks četri koncerti: etno muzykys koncerts, akustiskais i rokgrupu koncerti, kai ari gareiguos muzykys koncerts. Pyrmū reizi festivala ītvorā teik reikuots gareiguos muzykys koncerts, kas nūtiks svātdiņ, 6. julī Leiksnys Vyssvātuos Jēzus Sirds Ruomys katuoļu bazneicā. Pyrmū reizi festivala „Muzykys Skrytuļs” organizatori reikoj ari Etno muzykys koncertu, kas byus 4. juļa vokorā, kurā pīsadola aicynuotī dalinīki nu vysaidim Latvejis regionim. Dalinīki uzastuos koncertā ar dzīsmem sovys puses volūdā. Festivala 5. juļa koncertūs aicynuoti pīsadaleit solisti i muzykantu grupys akustiskajā koncertā (sastuovā da desmit cylvāku), muzykantu grupys (da septiņu cilvāku) – nakts koncertā i gosti nu aizrūbeža.
Festivalā „Muzykys Skrytuļs” teik saukti pīsadaleit na tikai muzykanti. Lai paplašynuotu festivala programu, radeitu muzykys i muokslys sinergiju, teik reikuots pleners „Muokslys Skrytuļs”, kura ītvorā nu organizatoru saguoduotajim materialim, muokslinīki roda breivdobys muokslys objektu.
Kotra sabīdriska organizaceja var pīsadaleit festivalā, organizejūt aktivitatis, kuruos teik paruodeita organizacejis darbeiba. Festivalā teik aicynuoti ari amatnīki i tierguotuoji, dūdūt vareibu īsaguoduot festivala gostim sovu produkceji. Sovu īguļdejumu var dūt sevkurs interesents, kurais gryb byut kai breivpruoteigais organizatoru paleigs.
Festivals ir nakomercials, tuo sanais moto „Kruot var na tikai naudu‟ ir spākā ari 2014. godā. Juoatguodynoj, ka jaunuos latgalīšu muzykys festivala „Muzykys Skrytuļs‟ reikuošona tyka suokta 2005.godā, atkuortuotai tys nūtyka ari 2006., 2007. i 2011. godā, popularizejūt latgaliskū identitati i veicynojūt jaunu dzīšmu radeišonu latgaliski.
Festivala nūlykumu, nūtikšonu programu i pīsacejuma anketys var atrast: www.liksna.lv.
Festivala jaunumim sekojit ari socialajūs teiklūs:
- www.draugiem.lv/muzykysskrytuls/,
- www.facebook.com/muzykysskrytuls,
- twitter.com/LiksnasKN,
- kai ari organizatoru škārsteikla sātys lopā www.liksna.lv
Festivalu reikoj Daugovpiļs nūvoda Kulturys puorvaļde i Leiksnys pogosta puorvaļde.
Vairuok informacejis:
Sanita Pinupe, Leiksnys pogosta Kulturys noma vadeituoja
Tuolr. +371 65475550, mob. +371 26058951;
E-posts: sanita.pinupe@liksna.lv