Latgalīšu kulturys ziņu portals lakuga.lv turpynoj dorbu
Vīneigais latgaliski rokstūšais kulturys portāls „Latgalīšu Kulturys Gazeta” aba lakuga.lv itūšaļt jau ir palics jau par vīnu nu latgalīšu kulturys vierteibom. Portalā vīnuvīt ir pīejama jaunuokuo informaceja par Latgolys i latgalīšu tradicionaluos i laikmeteiguos kulturys aktualitatem, izsmeļūši i profesionaļu veiduoti roksti par regiona viesturi, kulturu i nūzeimeigom personom. Taipat tei ir vīta, kur jaunajim i jau pīredzis boguotajim latgalīšu literatim i muzikim ir īspieja laseituojus īpazeistynuot ar sovu daiļradi. Bīži viņ portala laseituoji ir pyrmī, kas izzynoj par aktualitatem latgalīšu muzykā. Portals ir palics par sova veida latgalīšu puļciešonuos vītu škārsteiklā.Projektu „Latgalīšu Kulturys Gazeta” jau nu 2007. goda realizej bīdreiba „Latgolys Studentu centrs”, i itūšaļt tys dorbojās ar Latgolys regiona atteisteibys agenturys i Vaļsts kulturkapitala fonda “Latgales kultūras programmas” atbolstu. Itūšaļt aktualuo projekta mierkis ir atteisteit latgalīšu kulturys ziņu portalu lakuga.lv kai aktualuokū informativū olūtu par Latgolys i latgaliskuos kulturys nūtikšonom i procesim, veidojūt tū par latgaliskuos kulturys informacejis apritis centralū vītu i latgalīšu rokstu volūdys popularizietuoju.
Portalam ar sovu darbeibu ir izadevs latgalīšūs veicynuot pīdereibys sajiutu regionam i styprynuot nacionalū identitati, sekmēt sabīdreibys izpratni par Latgolys kulturys specifiku i tuos vītu Latvejis myusdīnu kulturys telpā.
Aicynojam ari pošus latgalīšus īsasaisteit portala satura veiduošonā i īsyuteit informaceju par sovys pusis latgaliskajim pasuokumim, viertiejumus par kulturys aktualitatem, rokstus par regiona viesturi, kulturu i cylvākim, kartenis, kuruos radzama Latgola, rokstūt iz epostu info@lakuga.lv. Taipat gaidom ari jaunūs latgalīšu literatu dzejūļus i stuostus, muziķu jaunuokūs skaņdorbus.
Portala jaunumim leidza var sekuot ari socialajūs teiklūs facebook.com/LaKuGa.lv i twitter.com/LaKuGa.
Informaceju sagataveja:
Laura Melne
Portala „Latgalīšu Kulturys Gazeta” redaktore
T. 26149207
info@lakuga.lv
www.lakuga.lv
