Reigā nūtiks Katuoļu studentu dīnys

Pīktū godu piec kuortys Reigys Augstuokais religejis zynuotņu instituts i Reigys Teologejis instituts aicynoj iz Katuoļu studentu dīnom ar mierki veicynuot sadraudzeibu i dūmu apmaiņu storp katuoļu studentim nu dažaidom augstškolom. Itūgod „Katoļu studentu dienas 2013” nūtiks Reigā 10. i 11. majā.

Kasdīnys steigā, burzmā i rutinā arviņ mozuok laika teik veļteits sovim meilajim, leidzcylvākim, ari sev i goreigajom vierteibom sevī. Majs, kas katuolim ir eipašs mieness, ir lobs laiks, lai apsastuotu i īsaklauseitu sevī, leidzcylvākūs i Dīvā. Studentim „Katoļu studentu dienu 2013” laikā byus īspieja kūpā ar leidzeigi dūmojūšim jaunīšim naformalā atmosfērā labi pavadeit laiku, atsapyust, īgiut jaunus draugus i vīnuotīs kūpejā lyugšonā i sarunā ar Dīvu. Lai pīsadaleitu pasuokumā, nav obligati juobyut katuoļam ci pīdereigam pi kaidys religejis, teik aicynuoti vysi, kuri gryb sajust kū vairuok, pīdzeivuot skaistus breižus i izzynuot par Dīvu i Juo lobajim dorbim.

Pasuokuma programa
10. majs, pīktdīne
17:30 – Svātuo Mise Sv. Marejis Magdalenys bazneicā, Klūstera īla 2
18:30 – Agape, īsapazeišona, Sv. Stefana zals, M.Piļs īla 2
19:30 – Sarunys par temu „Kristietis priekš citiem” ar uzjiemieju Tadeušu Surgoftu i žurnalisti Evu Lūsi, Sv. Akvīnys Tūma zals, M.Piļs īla 2
20:30 – Vesperis, slaviešonys i pīlyugsmis vokors Sv. Marejis Magdalenys bazneicā, Klūstera īla 2

11. majs, sastdīne
10:00 – Svātuo Mise Sv. Marejis Magdalenys bazneicā, Klūstera īla 2
11:00 – Plenarsēde, M.Pils īla 2
12:30 – Pušdinis
13:30 – Dorbs sekcejuos
17:00 – Konfereņcis nūslāgums, sekceju dorba kūpsavylkums, breivuo diskuseja

Ziņu sagataveja: LaKuGa