Kur kūklātuojs, tī breivs gors. Atsavieršona iz IX Kūklātuoju saītu Latgolā (Foto)
![](https://lpr.gov.lv/wp-content/uploads/2012/septembris-2012/5993-300x201.jpg)
Latvītis Pūdenis i Aivara Zareņa vadeibā beja īspiejams īsavuiceit kūklis spēlis pamatus i sasaspēlēt vokara koncertam.
Rolands Blezūrs nu Reigys leidzi beja pajiemis treis Anglejā taiseitys kūklis, kas jam duovynuotys bierneibā. „Piec treisdesmit godu pōrtraukuma nav vīgli atsuokt spēlēt. Kūklātuoju saīts ir estuo vīta, kur tū dareit. Ite vysi vīnaidi, gon tī, kurim kūklēšona ir pat maizis dorbs, gon tim kas atbraukuši vuiceitīs,” jis saceja.
Leidzpajimtuos kūklis ir cīši atškireigys, tai, pīmāram, Ilmārs Lucijanovs nu Jākubpiļs iz kūklis spuorna iedadzynuojis sova treis gadus vacuo dālāna zeimiejumu. Ar rokstim boguoteigi rūtuoti ir ASV i Anglejā darinuotī instrumenti.
Kotram īpasazeišona ar kūkli nūtykuse sovaižuok. Kristīne Līde i Muora Videņa nu Reigys spēlēt izsuoka „Latgaļu sātys” reikuotajuos etnogrāfiskajuos bārnu vosorys nūmetnēs.
Saīta organizatorim ir gandarejums, ka leluokuo daļa daleibnīku ir školys vacuma jaunīši i studenti. Tys līk dūmuot, ka ir nūdrūšynuota etnogrāfiskuos kūklis spēlis puormontuojameiba. Nū ūtrys pusis lela interese ir nu puornūvodu ļaudim, a daleibnīki nu Latgolys iztryukst.
Kūklātuoju saīta organizatore Marika Zeimule atsavodūt saceja, ka cytugod, dasmitajā pasuokuma godadīnā „Latgaļu sāta” planavojūt plošu pasuokumu, aicynojūt iz skotuvis muzykys grupys, kuru instrumentu kluostā ir kūkle.
Lai aplūkotu fotogaleriju, uzklikšķiniet uz bildes!
Latgaļu sāta
Karteņuos – kūklātuoju saīts, foto Gatis Staprēns, Daiņs Mjartāns