Aicynoj īīt rokstūšūs latgalīšu sīvīšu pasaulī
![](https://lpr.gov.lv/wp-content/uploads/2012/oktobris-2012/6169-300x98.jpg)
Atsasaucūt iz Virdžinejis Vulfys tezi — kab sīvīte raksteitu, jai ir vajadzeiga sova ustoba, pasuokumā aicynuotys pīsadaleit myusu dīnu latgalīšu autoris, kab definātu sovu rodūšu telpu — latgalīšu literaturā i literaturā vyspuor. Tekstūs i sarunuos byus īspieja izzynuot, kaida jei ir — rokstūša latgalīšu sīvīte. Kaids ir juos pasauļs. Kas jai ļaun rakstiet i daleitīs ar tekstim. Deļkuo i kod jei roksta.
Kotrs, kas atīs iz „Sovu ustobu”, igius caurlaidi iz latgalīšu dzejneicu dreizumā gaidamom gruomotom: Emilejis Kalvānis kruojumu „Atvosora” i Ingridys Tāraudys latvyski i latgaliski raksteitū kruojumu „Bolts šokolads”.
„Sovā ustobā” byus ari žurnala „A12” prezentaceja. Žurnals izīt sešys reizis godā i viestej pozitivus stuostus par cylvākim Latgolā i pasaulī. Jaunajā „A12” numerī — stuosti par laimi. Laimis stuosts ir vīnaiž spylgts, voi dzeivoj Boltkrīvejis pīrūbežā ci Pīreigā. Laimei ir skumeiga pīgarša, partū ka koč kū igiustūt, dasaīt i nu kuo atsasaceit. I voi mes modernajā pasaulī varim atsaļaut byut laimeigi?
Reigys Gruomotu svātki nūtiks nu 5. leidz 7. oktobram Reigys Kongresu nomā. Skaiteituojus gaideis 36 Latvejis izdevnīceibys, byus interesna kulturys programa ar pasuokumim lelim i mozim, īspieja samaineit puorskaiteituos gruomotys pret naskaiteitom i īkuoruotom, laimēt loterejā gruomotu. Dorba laiks: pīktdiņ i sastdiņ nu 11:00 leidz 19:00 stuņžu, svātdiņ nu 10:00 leidz 16:30 stuņžu. Īeja svātkūs — par veļti.
Reigys Gruomotu svātkūs byus pīejams daudz latgalīšu gruomotu, disku i suveniru, jūs sovā stendā pīduovuos bīdreiba „Latgolys Studentu centrs”.
Informaceju sagatavuoja Vineta Vilcāne
Kontakti: vineta@lgsc.lv, 26149207