dūmu pylni pogolmi/februars
Atspīžamīs iz elkūņim, veramīs pa lūgu, vīns iz ūtru.
Dabasim šudiņ mannys krōsa. Kai tūreiz tuksnesī, lai pabarōtu izsolkušūs. Vēļ ilgi tai byus? Bods. Pasaulī bods. Bet mes tikai izaveram žālsirdeigi. Tai soku es. Kurai baļķi obōs acīs, kotrā pa treis. Kait tod vyspōr teiri anatomiski es varātu saskatiet skoborgu tyvōkō acī? Nu tikai, ja man tik vīnā acī baļķi. Jaunōkō mūde. Prīdis stumbri acīs.
Taids muns pogolms šūreiz. Poškritisks. Nūlaižam acis. Baļķi atsasyt pret greidu. Raudōt gribīs. Osorys pōrsavieršās sveķūs, sveķi – dzintarūs. Tūmār skaists šys poškritiskais stōsts. Tevi naredz vairs pi palūdzis. Tu kaut kur esi nūgōjs. Es naradzu, bet dzieržu Tovus sūļus. Tu tyvojīs. Man kauns par sovim baļķim. Pat ja tis tagad ir moderni. Moderni kaunētīs? Nā, moderni staigōt ar baļķim acīs.
Tu salos vysus osoru sveķu dzintarus. Tu zini, ka Tev pošam acīs pōrs skoborgu, bet Tu nōc pi manis.
„Nu ta vilksim ōrā tūs Tovus baļķus! Nav kū sēdēt nūlaistom acim!”
Tu sasit plaukstys. Vēļ jau es dzieržu! Tu berzej plaukstys. Vēļ jau es dzieržu!
„Byus byuvmaterials kūka gaļdeņim!”
Pasmaidu. Tys izaklausie tik patīsi prīceigi.
Varbyut es tagad pasamūšu kai nu slykta sapyna. Kai parosti filmōs rōda. Bet tod jau jōatver acis. Bet ja jōs jau ir atvārtys, tod tōs otkol jōaizver, lai varātu otkol atvērt. Bet es jōs navaru aizvērt. Man acīs baļķi.
Vins mirklys.
Verūs, Tev rūkōs baļķi. Pasisti padusōs. Nazynu, voi saceit paļdis? Verūs, Tev acīs skoborgys. Pag, ļauj, man ari vajag izdareit lobu dorbu!
Es līku rūku iz Tovim plaksteņim. Radzu, jī rātōs. Man Tevis palīk žāl.
„Verīs man acīs! … Soki man tikai patīseibu!”
Mes tai stōvējom ilgi. Leidz trejim, četrim reitā. Tu man stōstēji patīseibu, es pi kotra Tova vōrda rōvu ōrā Tev nu acim skoborgys. Beigōs sagō taida pylna sārkūceņu kasteite. Pōrs skoborgu palyka man pierkstūs. Tōs pēc tam izraustieju. Sev atstōju.
Mes aizmygom vīns ūtra rūkos. Breivi nu baļķim, breivi nu skoborgom. Patīseibys svēteiti. Tevis salaseitī dzintari reita gaismeņā myrgōja. Kai saulis pīlīti.