Vīnkōršs reizrieķins
Reiz Aizaļksnis Andrivs
Pōr Palaidu īt,
I tukšūs īmovus skubynoj.
Niu Diervanīnis ļaudim kū smīt –
Tok siermeits pi Kupruku bubynoj….
A Andrivs tik purpynoj –
Viļksīs, voj nā?!
I peicku ap golvu sev vycynoj,
Kod īmovi zōlē aizaķerās,
I sirdeigi povodu trycynoj…
A vaineigs py vysa bej –
Petreņa ols!
Kū Diervanīnē te nasmōdej.
Kod pavairōk īdzarts – nav paradzams gols,
Tū Andriva pīmārs niu parōdiej.
Pēc svātkim, kod pokmeļam
Patakys lej,
Vīns ūtrs grib vuiceibu parōdeit,
I smītīs par kotru, kam prōteņš eiss,
Ar gudrom školom pasalīleit.
Tok vīnureiz Andrivs
Aizasvylōs,
I gudreļim prosa – cik itys dūs,
Kod byus pēc kōrtys sareizinōts –
Suseklis, trepes i mōla pūds????
Niu prōtnīkim vysym
Bej mutes cīt,
Lai tukšus solmus vairs nakuļstej!
I nav kū gūdeigu zemnīku rīt,
Kurš apķiereibu te parōdiej…