Vaicuojums Ministru prezidentam: Voi Jius runojat latgaliski?

18.majā LR Ministru prezidentam Valdim Dombrovskim īsnāgts Latvejis regionalūs i mozuok lītuotūs volūdu savīneibys (LatBLUL) īsnāgums ar pīprasejumu 2011.godā paradzātajā tautys skaiteišonā nūskaidruot latgalīšu i lībīšu volūdys lītuotuoju skaitu. Ir vajadzeigs beidzūt īvīst skaidreibu Latvejis autohtonūs īdzeivuotuoju volūdu lītuojuma kvantitativajūs ruodeituojūs.

Tys ir ari vajadzeigs, kab, atbylstūši volūdys lykuma 3. panta 4. daļā īraksteitajam vaļsts pīnuokumam, Latvejā paeistam nūdrūšynuot latgalīšu rokstu volūdys kai viesturiska latvīšu volūdys paveida saglobuošonu, aizsardzeibu i atteisteibu, kai ari dzēst vairuoku ministreju amatpersonu argumentu par naasūšim statistikys datim.

Atbylstūši Ministru kabineta nūsacejumim par 2011.goda tautys skaiteišonys programu (Nr. 384) vaicuojumā “Kaidu volūdu jius lītojit sātā?” ir tikai četri atbiļdis varianti: “latvīšu, krīvu, boltkrīvu voi cytu (īroksta kaidu)”. 2000. goda tautys skaiteišona paruodeja, ka pozicejā “cyta” īraksteituo latgalīšu volūda natyka jimta par pylnu, deļ tuo ir prīšklykums papyldynuot īspiejamūs atbiļdis variantus ar lībīšu, latvīšu/latgalīšu, poļaku, ukraiņu i lītovīšu volūdu.

Kab naturpynuot vairuoku godu garumā ilgstūšū naaugleigū diskuseju i nūdrūšinuot skaidru tuoluoku virzeibu latvīšu volūdys paveida (latgalīšu rokstu volūdys) vierteibu saglobuošanā i atteisteibā, LatBLUL jūprūjom uzstuoj iz vajadzeibu izveiduot dorba grupu programys izstruodei, juridiskūs terminu preciziešonai i dokumentu sagotovuošonai, apsaverūt īspiejis latgalīšu volūdai daškiert konkretu statusu vaļsts volūdys politikys kontekstā, kai ari vajadzeigūs MK nūsacejumu, normativūs aktu i cytu dokumentu sagotovuošonai, kas paradzātu vaļsts garantātu īspieji lītuot latgalīšu rokstu volūdu, kai ari Latgolys regiona školuos vuiceit latgalīšu volūdu, literaturu i kulturviesturi.

Itū Latvejis regionalūs i mozuok runuotūs volūdu savīneibys (LatBLUL) iniciativu atbolsta: “Latgalīšu volūdys, literaturys, kulturviesturis školuotuoju asociaceja”, Latgolys Studentu centrs, bīdreiba „Kukuži”, bīdreiba “Latgalīšu Etnokulturys centrs”, bīdreiba „Es Latgalei”, Latgolys tradicionaluos kuļturys centrs „Latgaļu sāta”, bīdreiba “Upītes jauniešu folkloras kopa”, Latgolys producentu grupa i.c.