Stuovieju, dzīduoju
Stuovieju, dzīduoju,
Lai pošam prīca!
Verūs kai nūkaļnē veitūli līcās.
Aizīt lejā ar iudiņa spaņim
Muoseņa muna
Pulkā ar bārnim.
Stuovieju, dzīduoju…
Tuolumā verūs.
Latgalis nuokūtni īraudzeit cerūt.
Izaugs tī bārni, voi byus vēļ cyty,
Kuri reiz stuotūs
Itamū vītā?
Stuovieju, dzīduoju…
Kurš gon vairs klausuos?
Sabuoztys radio antenas ausīs,
Pylny ekrani lātajim šovim…
Skrīnam bez jāgys –
Leidz ībraucam gruovī.
Stuovieju dzīduoju…
Komūls man koklā.
Jaunuo pasaule ruodīs tik sakla.
Palīk tukši Latgalis lauki,
Sātys bez vuorda,
Nanūsauktys…
Stuovieju, dzīduoju,
Cerūt, ka atīs
Laiki, kod vareišu otkon jyus satikt.
Cikom vēļ dzīsme puor kolnim skanēs –
Dzymtajuos vītuos
Meklejit mani…
08.04.2010