Sovvaļnīks puorcīts kuojis operaceji
![](https://lpr.gov.lv/wp-content/uploads/2007/bodrap-bildis/2096.jpg)
Stuosta Ingars “Operaceju Ādažu slimneicā taiseja vīns nu lobuokajim Latvejis specialistim – kirurgs traumatologs (ari Latvejis Olimpiskuos komandys uorsts konsultants) Jānis Viļums. Operaceja beja pasmoga, par tū ka beja gon juoteira meniski, gon juoatjaunoj krysteniskuo saite, kas beja pilneibā sarauta. Ir cylvāki, kas ari var iztikt bez ituos saitis, nu maņ regularai ceļagols “kriss” uorā, leidza ar tū piec konsultacejom ar uorstu pīkrytu operacejai, kab jau rudini varātu atsagrīzt Rēzeknes sporta dzeivē. Tai kai maņ ir cīti kauli, tod nav izturiejus pot stiprinuojuma skryuve i gols golā gaduojs izmontuot pošu stypruokū pīeimamū metalu – titana skryuvi kuo rezultatā operaceja īsavylka iz 3 stuņdem. Rehabilitaceja poša par sevi ir pasmoga taišni dažaidu naierteibu ziņā: kruķi, īrubežuota puorsavītuošonuos, suopis i vēļ vysaiduoki seikumi, kas pošu reizi naļaun izbaudeit mīra. Īspiejams, ka pīdzeivuotuos suopis rass atspulgu kaidā nu dzīsmem, kurys varbyut kuodu reizi vēļ tiks sacarātys. Pilneiga atsagrīzšona aktivā dzeivis veidā ir piec 9 mienešim, kas mani drupeit satrauc, nu caru iz rodu, tyvinīku i dāla Mareka atbolstu. Par tū dūmoju, ka atsagrīzšu uotruok. Kab nabyutu juogaida pusgoda ryndys, pīkrytu pots apmuoksuot operaceji, kab tiktu uotruok iz kuojom – kai ni kai – vēļ šaitai taidi dorbi itymā pasauļā ir juopadora iz vasalom kuojom!”
Sovvaļnīks byus cīš prīceigs, ka ar Tu atbaļsteisi jū, klausūtīs Sovvaļnīka muzyku, pierkūt muzykys albumu “Sūpluok” i gaidūt koncertus, kas varātu nūtykt vaira pavasara pusē – piec atlobšonys nu operacejis!