Sovvaļnīks fiļmejas muzykys video i kinā
“Vosoruošonai” – tai saucuos dzīsme, kura pyrmūreiz atskaņuota 2006. goda beiguos kai grupys Borowa Mc dalinīka Ingara Gusāna (Sovvaļnīka) i grupys Bez PVN (solisti bruoli Kristaps i Guntis Rasimi) kūpdorbs. Tāņ dzīsme, kurys teksts ir raksteits kai himna latgalīšu volūdys entuziastim i cylvākim, kas dorbojuos latgalīšu volūdys kūpšonā, ir puorraksteita studejā pi muzykys producenta Ginta Stankeviča, i pavysam dreiž interesentim tiks atruodeits video klips kūpā ar jaunū dzīsmis verseju.
Video teik taiseits dažaiduos vītuos – urbanā vidē Reigys centrā, kai ari breivā dobā Lapmežcīmā. Režisors, taipat kai pyrmajam Sovvaļnīka video klipam dzīsmei “Vysi vieji”, ir Ingus Amatnieks, video tūp studejā 13mm.
Ingars Gusāns, kas publiskā telpā sliepuos aiz saulisbrillem i gierbuos malnuos drēbēs, rūtuojūtīs ar naskaitomim gradzanim, kiedem i auskarim, sovā solo projektā naratai pasaruoda natipiskā paskotā. “Es dzīžu par dvēseliskom lītom, atkluojūt dvēseli i cenšūtīs paruodeit latgalīša dobu kūpumā. Deļ tuo vaira nasabeistu ari uoreji izavērt vīnkuoršuok i nasaslēpt,” tai par vizualom puormaiņom soka Ingars, pībilstūt: “Puorlīceibu par izvālātuo ceļa pareizeibu manī styprynoj daudzu latgalīšu atbolsts, bez kuru paleidzeibys es navarātu radeit itūs īrokstus i nūdūt viesti klauseituojim.”
Ingars Gusāns ari pīsadola viesturiskuos kinys “Latgales laikadečs” topšonā, kurys režisors ir Edgars Bļinovs, scenareja autore – Anna Rancāne, komponists – Gunārs Igaunis.
