Rēzeknē nūtykuse Latgolys školuotuoju konference
2010. g. 27. novembrī Rēzeknē, Rēzeknis nūvoda dūmē, Atbreivuošonys alejā 95, nūtyka Latgalīšu volūdys, literaturys i kulturviesturis školuotuoju asociacejis organizeituo Latgolys školuotuoju konference “Latgolys kulturys montuojuma vīta izgleiteibys sistemā”. Konferencis mierkis – apvīnuot Latgolys školuotuojus i rūsynuot Latgolys kulturys montuojuma īkļaušonu izgleiteibys sistemā, tai sekmejūt Latvejis nuokūtnis sabīdreibys izgleituoteibu, toleranci i atbolstūt Latgolys latvyskū identitati.Konferencē pīsadaleja školuotuoji, zynuotnīki, Izgleiteibys ministrejis, ISEC i navaļstiskūs organizaceju puorstuovi. Sūpluok referatim par Latgolys kulturys montuojuma īkļaušonu Latvejis izgleiteibys sistemā i vuiceibu saturā rysynova diskuseja par latgalīšu volūdys, literaturys i viesturis īkļaušonu Latvejis vuiceibu standartūs i programuos.
“Vaļsts kulturpolitikys vodlinejuos 2006.-2015. godam” latgalīšu rokstu volūda ir atzeita par Latvejis vaļsts nacionalū bagateibu. Latveja ir vīneiguo vīta iz pasauļa, kur var atsateisteit i tikt saglobuota i nūdūta cytom paaudzem latgalīšu rokstu volūda i Latgolys latvyskuo kultura, deļtuo Latvejis izgleiteibys sistemai ir juonūdrūsynoj vareiba īsapazeit ar itom vierteibom.
Konferencis laikā školuotuoji i navaļstiskūs organizaceju puorstuovi informeja par sovu pīredzi, gryuteibom i sasnīgumim latgaliskuo kulturmontuojuma saglabuošonā i latgaliskuos kulturys, literaturys, volūdys īkļaušonā vuiceibu saturā.
Koč formalai i itūšaļt Latvejis školuos ir vareiba fakultativi apgiut latgalīšu rokstu volūdu, literaturu i kulturys viesturi, vysleidza školuotuoji tam nav sagataveiti, tryukst atbylstūšu vuiceibu materialu i pīredzis, leidza ar tū leluokuo daļa školuotuoju, škoļnīku i jūs vacuoku par itū vareibu interesejās moz.
Nu Latvejis neatkareibys atjaunuošonys jau ir izaugušys div paaudzis, kas školā nav apgivušys latgalīšu rokstu volūdu, kas ir aizasuokuse vaira kai pyrms 250 godu, i nav tykušys izgleituotys par Latgolys kulturu i viesturi, nav īsapazynušys latgalīšu literaturu.
Konferencē rysynova diskuseja par vareibu Latvejis školuos jaunīšus īpazeistynuot ar Latgolys kulturys montuojumu, kas cauri puorpūļuošonys i puorkrīvuošonys godu symtim ir paleidziejs saglobuot Latgolys nūvoda latvyskū ideņtitati, i ar myusu dīnu latgalīšu kulturu, juos davumu kūpnacionalajā kulturā, latgalīšu rokstu volūdā izdūtū plašū literaturys kluostu i periodiku.
Informaceju sagatavēja
Veronika Dundure,
Latgalīšu volūdys, literaturys i kulturviesturis školuotuoju asociacejis vadeituoja
