Pyrmū reizi saskaiteis ari latgalīšu volūdys lītuotuojus
Cytugod paradzātajā tautys skaiteišonā apzynuos ari latgalīšu volūdys zynuotuojus, informej Ekonomikys ministreja, kas sagatavejuse grūzejumus 2011.godā planavuotuos tautys skaiteišonys anketā, papyldynojūt vaicuojuma “Kaidu volūdu Jius puorsvorā lītojit sātā?” atbilžu variantus i eipaši izdolūt latvīšu volūdys paveidu, tys ir latgalīšu volūdu. Tyvuokajuos Ministru kabineta sēdēs itys vaicuojums tiks puorsavārts.Ministreja sagatavejuse i jau tyvuokajuos Ministru kabineta sēdēs tiks puorsavērti grūzejumi 2011.godā planavuotuos tautys skaiteišonys anketā, papyldynojūt vaicuojuma “Kaidu volūdu Jius puorsvorā lītojit sātā?” atbilžu variantus i eipaši izdolūt latvīšu volūdys paveidu, tys ir latgalīšu volūdu.
Pašreiz ministrejis pīduovuotuo atbiļdis redakceja (www.em.gov.lv) izaver par daudz sarežgeita, dūmojams, ka tyvuokajā laikā tei varātu tikt precizāta iz logiskuoku.
Kotrā gadejumā tautys skaiteišonys intervātuojim dūmuotajuos rūkysgruomotuos kai izskaidrojūšs atbiļdis pīvadums iz vaicuojumu byus mynāta taišni latgalīšu volūda.
Tautys skaiteišonys laikā apzynuot ari latgaliski runojūšūs aicynova Latvejis regionalūs i mozuok lītuotūs volūdu savīneiba, nūruodūt, ka saskaņā ar Vaļsts volūdys lykumu vaļstej juonūdrūšynoj latgalīšu rokstu volūdys saglobuošona, aizsardzeiba i atteisteiba. Savīneiba nūruodejuse, ka da itam vaļstej nav nikaidu statistikys ruodeituoju par latgalīšu volūdys lītuotuoju skaitu i tuo izmaiņom; dažaidūs olūtūs tys nūruodeits nu 100 000 da 300 000.
Tautys skaiteišona Latvejā nūtiks nu 2011.goda 1.marta da 31.majam.
